ޖަރުމަނުގެ ހުނަރުވެރި މިޑްފީލްޑަރު އޮޒިލް ނެރުނު ރަސްމީ ބަޔާނެއްގައި އޭނާ ބުނެފައި ވަނީ ޖަރުމަނުގެ ފުޓުބޯޅަ އިދާރާއިން އޭނާއާ ދޭތެރޭ ކަންތައްތައް ބެހެއްޓި ގޮތުން ޤައުމީ ޓީމަށް ދެން ކުޅެން އޭނާ ބޭނުންނުވާކަމަށެވެ.
ޖަރުމަނުގެ ފުޓުބޯޅަ އިދާރާގެ ބައެއް އޮފިޝަލުންނަށް ތުހުމަތުކޮށް ސޯޝަލް މީޑިއާގައިވެސް ޕޯސްޓްކޮށް އޮޒިލް ނެރުނު ބަޔާނުގައިވަނީ، އެ ޤައުމުގެ ފުޓްބޯޅަ އެސޯސިއޭޝަނުގެ ބައެއް އޮފިޝަލުންގެ ފަރާތުން ފެނިގެންދިޔައީ އިހްތިރާމުކުޑަ ކަންކަން ކަމަށާއި، ނަސްލީގޮތުން ދިމާކޮށްފައިވާ ކަމަށެވެ. މިއީ އުނދަގޫ ނިންމުމެއްނަމަވެސް، މީގެފަހުން ޖަރުމަން ޤައުމީ ޓީމަށް މެޗެއް ނުކުޅޭނެކަން އޮޒިލް ވަނީ އެބަޔާނުގައި އިޢުލާން ކޮށްފައެވެ.
އިނގިރޭސި ކްލަބު އާސެނަލްގެ މިޑްފީލްޑަރު އޮޒިލްއަށް ފާޑުކިޔުންތައް އަމާޒުވީ ދާދިފަހުން ތުރުކީގެ ރައީސް ތައްޔިބް އުރުދުޣާންއާއެކު ނެގި ފޮޓޯތަކަކާއި ގުޅިގެންނެވެ. އޮޒިލް އާއެކު ޖަރުމަން ޤައުމީ ޓީމުގެ މިޑްފީލްޑަރު އިލްކޭ ގުންޑޮގާންވެސް ވަނީ އެފޮޓޯގައި ބައިވެރިވެފައެވެ. މިދެ ކުޅުންތެރިންނަކީވެސް ޖަރުމަނުގެ ތުރުކީގެ ނަސްލަށް ނިސްބަތްވާ ކުޅުންތެރިންނެވެ.
އޮޒިލްގެ ބަޔާނުގައިވާގޮތުގައި ޖަރުމަނު މޮޅުވާނަމަ އޭނާ ވަނީ ޖަރުމަނު މީހަކަށްކަމަށާއި، ބަލިވާ ހާލަތު އޭނާ ވަނީ ހިޖުރަކޮށްފައިވާ ތުރުކީގެ މީހަކަށް ކަމަށެވެ. އަދި ސަޕޯޓަރުންގެ ފަރާތުން އޭނާއާއި އާއިލާއަށް މަރުގެ އިންޒާރުތަކާއި ނަސްލީ ގޮތުން ދިމާކުރުންތައް އައިސްފައިވާ ކަމަށްވެސް އޮޒިލްގެ ބަޔާނުގައި ބުނެފައިވެއެވެ.
އޮޒިލްއަށް ޖަރުމަނުގެ ފުޓްބޯޅައިގެ އޮފިޝަލުންނާއި، އާންމުންގެ ދިމާކުރުންތަކާއި ފާޑުކިއުންތައް އިތުރަށް އަމާޒުވެފައިވަނީ، 80 އަހަރަށްފަހު އެޓީމު ފުރަތަމަ ފަހަރަށް ވޯލްޑްކަޕްގެ މުބާރާތެއްގެ ގްރޫޕް ސްޓޭޖުން ކެޓުމާ ގުޅިގެންނެވެ.
އުރުދުޣާންއާއެކު ނެގި ފޮޓޯއާއި ގުޅިގެން ޖަރުމަނުގެ ފުޓްބޯޅަ ފެޑަރޭޝަނުގެ ޗީފް ރެއިންހާޑް ގްރިންޑެލް ވިދާޅުވީ އެއީ ރަނގަޅު ކަމެއް ނޫން ކަމަށެވެ. އަދި އެހެން ގައުމެއްގެ ރައީސެއްގެ ކެމްޕެއިނުގައި ގައުމީ ޓީމުގެ ކުޅުންތެރިން ބައިވެރިވުމަކީ ބަލައިގަނެވޭނެ ކަމެއް ނޫން ކަމަށްވެސް ވަނީ ބުނެފައެވެ.
ޖަރުމަނުގެ ކުރީގެ ކުޅުންތެރިޔާ އަދި ޤައުމީޓީމުގެ މެނޭޖަރު އޮލިވިއޭ ބިއަހޯފް ކުރިން ދިން އިންޓަވިއުއެއްގައި އޭނާ ބުނެފައިވަނީ މިދިޔަ ވޯލްޑްކަޕްގައި ބައިވެރިވި ޖަރުމަނުގެ ޤައުމީޓީމުގައި އޮޒިލް ހިމެނުމަކީ އެޤައުމުގެ ފުޓުބޯޅަ އިދާރާއިން ހެދި ވަރަށް ބޮޑު ގޯހެއްކަމާއި އޭނާ ނުނެގިނަމަ ވޯލްޑްކަޕްގައި އެޓީމުން މާ ރަނގަޅު ނަތީޖާ ނެރޭނެ ކަމަށެވެ.
2009 ވަނަ އަހަރުން ފެށިގެން ޤަވާއިދުން ޤައުމީޓީމަށް ކުޅެމުން އައި އޮޒިލް ވަނީ މިހާތަނަށް އެޓީމަށް 92 މެޗު ކުޅެ 23 ގޯލް ކާމިޔާބުކޮށް، 40 ލަނޑުޖެހުމަށް އެހީވެދީފައެވެ.
ޖަރުމަނުގެ ޤައުމީ ޓީމު 2014 ވަނަ އަހަރުގެ ވޯލްޑްކަޕްގެ ތަށި ކާމިޔާބުކުރިއިރު އެޓީމުގައި މުހިއްމު ދައުރެއް އަދާކުރި އޮޒިލް ވަނީ ޖަރުމަނުގެ އެންމެ މޮޅު ކުޅުންތެރިޔާގެ މަޤާމްވެސް ފަސްފަހަރު ހޯދާފައެވެ.