ދެހާސް އެގާރަ ވަނަ އަހަރު ސާކް ސަމިޓާއި ދިމާކޮށް އައްޑޫ ސިޓީގައި ބެހެއްޓި މޮނިއުމެންޓްތަކަކީ ޣައިރު މުސްލިމުން އަޅުކަން ކުރޭ ފަދަ ތަކެތި ކަމަށް ހިތަދޫ މެޖިސްޓްރޭޓް ކޯޓުން ކަނޑައެޅިއެވެ. އެތަކެތި ނައްތާލުމަށް ސިޓީ ކައުންސިލްގެ މައްޗަށް ކޯޓުން އަމުރު ވެސް ކުރިއެވެ.
އޭރު ވެސް މިހާރު ވެސް ސިޔާސީ ފަރާތްތަކުން ބުނަމުން ގެންދަނީ ނަޝީދުގެ ސަރުކާރުން އައްޑޫގައި "ބުދު ބެހެއްޓީ" ކަމަށެވެ. ރައީސް ނަޝީދުގެ ސަރުކާރާއި ދެކޮޅަށް އިދިކޮޅު ފަރާތްތަކުން އެންމެ ބާރަށް އަޑު އުފުލަމުން ދިޔައީ "ބުދު ބެހެއްޓި" ކަމުގެ ތުހުމަތާއި އެކުގައެވެ.
އޭގެ 7 އަހަރު ފަހެވެ. ރާއްޖޭގެ ރިސޯޓެއްގައި ތަރައްޤީ ކުރި ކަނޑުއަޑީގެ މިއުޒިއަމެކެވެ. އެތަނުގައި ވެސް ބަހައްޓާފައި ހުރީ އިންސާނުންގެ ސޫރަ އާއި އެއްގޮތް މޮނިއުމެންޓްތަކެކެވެ. ނަޝީދުގެ ސަރުކާރުގައި އައްޑޫގައި ބެހެއްޓީ "ބުދުތަކެއް" ކަމަށް ވިދާޅުވި ބޭފުޅުން ކަނޑު އަޑީގެ މިއުޒިއަމްގައި ހުރި ބުދުތައް ސިފަކުރައްވަނީ "ތަރައްޤީ"ގެ ގޮތުގައެވެ.
ސުވާލަކީ، ކަނޑުއަޑީގެ މިއުޒިއަމްގައި ހުރި އިންސާނުންގެ ސޫރަ ސިފަވާ ފަދަ މޮނިއުމެންޓް ތަކަކީ ދީނާއި ޚިލާފުތަކެތި ކަމުގައި ކަނޑައަޅައި ދިނުމަށް އެދި ކޮންމެވެސް މީހަކު ކޯޓަށް މައްސަލަ ހުށަހަޅާފާނެ ހެއްޔެވެ؟
ފަހަރެއްގައި އެކަން ނުކޮށްގެން އުޅެނީ، އަދި ގިނަ މީހުންނަށް ކަނޑުއަޑީގެ މިއުޒިއަމްގައި ހުރި ބުދުތައް ކައިރިން ނުފެންނާތީ ކަމަށް ވެސް ވެދާނެއެވެ.