އެއްކޮޅަކަށް ދުއްވާފައި ދިޔަ ދެ ކާރުގެ ތެރެއިން އެއް ކާރު އޮވަޓޭކް ކުރަން އުޅުމުގެ ތެރޭގައި ކޮންޓްރޯލް ނުވެ ގޮސް އިކްޓޯރިއަލް ކޮންވެންޝަން ސެންޓަރު (އީސީސީ) ގެ ކިޅިތެރެއަށް ވެއްޓިއްޖެ އެވެ.
ދެ ކާރު ޖެހިގެން ހިނގި މި ހާދިސާގައި ކިޅީގެ ތެރެއަށް އެއް ކާރު ވެއްޓިފައިވާ އިރު އަނެއް ކާރު އޮތީ ކިޅި އާ ދިމާލު ވިނަގަނޑުމަތީ ތާށިވެފަ އެވެ.
އެނގިފައިވާ ގޮތުގައި މި ހާދިސާ ހިނގީ ދެ ކާރު އާރްއޭއެފް ސަރަހައްދުން ދުއްވަމުން ގޮސް، އީސީސީގެ ކުރިމަތީ އޮންނަ މަގުން ދުއްވާފައި ދަނިކޮށް އީސީސީގެ އާ ދިމާލު ކަންމަތީގައި ޖަހާފައި ހުރި ސީސީޓީވީ ކެމެރާ ހުރި ހިސާބުންނެވެ. ދެ ކާރު ވެސް ދިޔައީ ބޮޑު މަގަށް އަރަން ކަމަށް ވެ އެވެ. ދެ ކާރަކީ ވެސް ހިތަދޫގެ ދެ ކާރެވެ.
ކިޅިތެރެއަށް ވެއްޓުުނު ކާރު ދުއްވަން އިނީ ހިތަދޫ ރަސްއައިން އިބްރާހީމް ޝަފީގް، 21، އެވެ. އަނެއް ކާރު ދުއްވަން އިނީ ހިތަދޫ އަރާއިރު މުހައްމަދު އާދިލް އެވެ. އެ ދެ މީހުންގެ އަތުގައި ވެސް ލައިސަންސް އޮތެވެ.
މި ހާދިސާގައި ދެ ކާރުގައި ތިބި އެއްވެސް މީހަކަށް ގެއްލުމެއް ލިބިފައެއް ނުވެ އެވެ. ކިޅީގެ ތެރެއަށް ވެއްޓުނު ކާރުގައި އިނީ އެކެކެވެ. އަނެއް ކާރުގައި ތިން މީހުން ތިއްްބެވެ. އެއިން އެއްވެސް މީހަކަށް ގެއްލުމެއް ލިބިފައެއް ނުވެ އެވެ.
އެކަމަކު ދެ ކާރަށް ވެސް ބައެއް ކަހަލަ ގެއްލުންތައް ލިބިފައިވެ އެވެ. ކިޅި އަށް ވެއްޓުނު ކާރު ނެގުމުގެ މަސައްކަތް މިހާރު އަންނަނީ ކުރަމުންނެވެ.