އައްޑޫގެ އަވަށްތަކުގެ ތެރެއިން ޕީޕީއެމްގެ ހަރަކާތްތައް އެންމެ ގަދައަށް ކުރިއަށް ގެންދަނީ ފޭދޫގައެވެ. އެ ދާއިރާ ފިޔަވައި މެދުކެނޑުމެއް ނެތި ހަރަކާތްތައް ކުރިއަށް ގެންދާ ޕީޕީއެމްގެ އޮފީހެއް ހުރި އަވަށެއް އައްޑޫގައި ނެތެވެ. އެންމެ ބާރަށް "ތަރައްޤީ"ގެ ވާހަކަ ދައްކަނީ ވެސް ހަމަ ފޭދޫ ޕީޕީއެމް މެންބަރުންނެވެ.
ސުވާލަކީ، އާބާދީގައި 5 ހާހަށް ވުރެ ގިނަ މީހުން ހިމެނޭ ފޭދޫއަށް ޕީޕީއެމްގެ ވެރިކަމުގެ ކޮށްދިނީ ކޮންކަމެއް ހެއްޔެވެ؟ ޔަޤީންވީ ކޮން ތަރައްޤީއެއް ހެއްޔެވެ؟
ސަރުކާރުން އާއްމުކޮށްފައިވާ ތަފާސް ހިސާބުތަކެކެވެ. އެ ތަފާސް ހިސާބުތައް ބުނާގޮތުން 8 ދާއިރާއަކުން ހިންގާފައިވާ 10 މަޝްރޫޢަކަށް 112.4 މިލިއަން ރުފިޔާ ވަނީ ޚަރަދުކޮށްފައެވެ.
ފޭދޫގައި މި ސަރުކާރުން ހިންގި އެންމެ ބޮޑު މަޝްރޫޢަކީ، ގާތްގަނޑަކަށް 155 މިލިއަން ރުފިޔާ ޚަރަދުކޮށްގެން ހިންގި ފޭދޫ ބިން ހިއްކުމުގެ މަޝްރޫޢެވެ. އެ މަޝްރޫޢަށް ފަހު ފޭދޫ ހިއްކި ބިމުގައި އަޅަން ސަރުކާރުން ވައުދުވި ފްލެޓްތަކާއި ގެސްޓް ހައުސް މަޝްޜޫޢު އަދި ފެށިފައެއް ނުވެއެވެ. އެކަން ފެށޭނެ ދުވަހެއް އަންދާޒާ ކޮށްލަން ވެސް ނޭނގެނީއެވެ.
ފޭދޫ ސްޕޯޓްސް ކޮމްޕްލެކްސްގެ ވަށާފާރު ރޭނުމަށް 4.5 މިލިއަން ރުފިޔާ ޚަރަދުކޮށްފައިވާ ކަމަށް ސަރުކާރުން ހާމަކޮށްފައިވާއިރު މިހާތަނަށް ވެސް އެފާރެއް ރާނާފައެއް ނުވެއެވެ. ސްޕޯޓްސް އެރީނާގައި ކުރި މަސައްކަތާއި އަދި މިހާރު އެތަން ހުރި ގޮތް މަތީގައިވާ ފޮޓޯ އިން އެފެންނަނީއެވެ.
އެހެންވެ ބެލެވޭ ގޮތުގައި ފޭދޫ ސްޕޯޓްސް ކޮމްޕްލެކްސްގެ ވަށާފާރު ރޭނުމަށް ޚަރަދުކުރި ކަމަށް ބުނާ 4.5 މިލިއަން ރުފިޔާ އަކީ ވިމްލާ ކޮންސްޓަރަކްޝަން އާއި ހަވާލުކޮށްގެން ހަދާ ފޭދޫ ސްޕޯޓްސް ކޮމްޕްލެކްސް އަށް މިހާތަނަށް ޚަރަދުކޮށްފައިވާ ފައިސާ އަށް ވެދާނެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ފޭދޫ އިންޑޯ ކޮމްޕްލެކްސްގެ ކޮންޓްރެކްޓަރަށް އެ މަޝްރޫޢުގެ އަގުގެ އެއްބައި ވަނީދީފައެވެ. ފޭދޫ އިންޑޯ ކޮމްޕްލެކްސްގެ މަސައްކަތް މުއްދަތަށް ނުނިމި ލަސްވަމުން ދިޔަ ނަމަވެޗް ވިމްލާ އާއި އެކު ހަދާފައިވާ ކޮންޓްރެކްޓް ބާތިލް ނުކުރެވިގެން އުޅޭ ސަބަބަކީ އެއީ ކަމަށް އައްޑޫގައި ހުންނަ ޔޫތް މިނިސްޓްރީގެ ކޯޑިނޭޓަރަކު ވެސް ވަނީ ޔަޤީންކޮށްދީފައެވެ.
ރައީސް ޔާމީންގެ ވެރިކަމުގައި ފޭދޫގައި 340 މީޓަރަށް ތާރުއަޅާފައިވާއިރު، އެކަމަށް 8 މިލިއަން ރުފިޔާ ވަނީ ޚަރަދުކޮށްފައެވެ. މީގެ އިތުރުން ފޭދޫގައި ހަދާފައިވާ، ފުޓްސަލް ދަނޑަށް 4 ލައްކަ އެއްހާ ރުފިޔާ ސަރުކާރުން ޚަރަދުކޮށްފައިވާ ކަމަށް ބުނެފައިވާއިރު، ފުޓްސަލް ދަނޑު ތަރައްޤީ ކުރި އިރު އެއީ އެސްޓީއޯ އިން ތަރައްޤީކުރި ދަނޑެއް ކަމަށް އެސްޓީއޯގެ އޭރުގެ ވެރިން ވަނީ ވާހަކަ ދައްކާފައެވެ.
22 މިލިއަން ރުފިޔާ ޚަރަދުކޮށްގެން ކުރިއަށްދާ ފޭދޫ ސްކޫލްގައި ހަދާ ހަތަރު ބުރީގެ އިމާރާތުގެ މަސައްކަތް މިހާރު ކުރިއަށް ދާއިރު، އެ މަޝްރޫޢު ނިމުމުން ފޭދޫ ސްކޫލަށް "ހިންދެމިލެވޭނެ" ކަމަށް އެ ސްކޫލްގެ ވެރިން ވެސް ޤަބޫލުކުރައްވައެވެ.
އައްޑޫގެ އަވަށްތަކުގައި ކުރިއަށް ގެންދާ ޖުމްލަ 35 މިލިއަން ރުފިޔާގެ ފެނުގެ ނިޒާމު ޤާއިމްކުރުމުގެ މަޝްރޫޢުގެ ތެރެއިން ފޭދޫގެ ގެތަކަށް ވެސް ފެނުގެ ޚިދުމަތް މިހާރު ވަނީ ފޯރުކޮށްދީފައެވެ. ސަރުކާރުން އާއްމުކޮށްފައިވާ ހިސާބުތަކަށް ބަލާއިރު ފޭދޫގައި ކުރިއަށް ދިޔަ އެ މަޝްރޫޢަށް 5.8 މިލިއަން ރުފިޔާ ވަނީ ޚަރަދުކޮށްފައެވެ.
މީގެ އިތުރުން ފޭދޫގައި ނަރުދަމާގެ ނިޒާމު ޤާއިމްކުރުމަށް 44 މިލިއަން ރުފިޔާގެ މަޝްރޫޢެއް އެމްޓީސީސީން މިހާރުކުރިއަށް އެބަގެންދެއެވެ. އެމަޝްރޫޢު ނިންމަން ބުނި ތާރީޚު ފަހަނަޅައި ގޮސްފައިވާއިރު އެމްޓީސީސީން ބުނާ ގޮތުގައި އަމާޒަކީ "ވީހާވެސް އަވަހަކަށް" އެމަޝްޜޫޢު ނިންމާލުމެވެ.
ފޭދޫއަށް ދިމާވެފައިވާ ފެންބޮޑުވުމުގެ މައްސަލަ ހައްލުނުކުރެވި ދިގުލައިގެން ދިޔުމަކީ ފޭދޫގެ ރައްޔިތުންގެ އެންމެ ބޮޑު އެއް ކަންބޮޑުވުމެވެ. އެހެން ނަމަވެސް ގިނަ ދުވަސްތަކަކަށް ފަހު ދާދި ފަހުން އެ މަސައްކަތް ވެސް ވަނީ ކޮންޓްރެކްޓަރާއި ހަވާލުކޮށްފައެވެ. އެހެންވެ ފޭދޫ ރައްޔިތުން ތިބީ އެ މަޝްރޫޢު ވެސް އަވަހަށް ކުރިއަށް ދާނެ ކަމުގެ އުއްމީދުގައެވެ.