ފްރާންސްގެ ކްލަބް ބޯޑޯ އަށް ކުޅެމުން އަންނަ ބްރެޒިލްގެ ވިންގާ މެލްކޮމް އިޓަލީގެ ރޯމާ އަށް ބަދަލުވުމުގެ ހުރިހާކަމެއް ގާތްގަނޑަކަށް ނިމިފައިވަނިކޮށް، އެންމެ ފަހު ވަގުތު ސްޕެއިނުގެ ބާސެލޯނާއިން އޭނާ ގެންދިއުމަށް ޝައުޤުވެރިކަން ފާޅުކުރުމުން ރޯމާއާއިއެކު ވެފައިވާ އެއްބަސްވުން ހުއްޓުމަކަށް ގެނައުމުން އެ ކްލަބުން ރުޅި އަތުވެއްޖެއެވެ.
އުމުރުން 21 އަހަރުގެ މެލްކޮމް އިޓަލީގެ ރޯމާ އަށް ބަދަލުވުމަށް ހަމަޖެހިފައިއޮތީ 40 މިލިއަން ޔޫރޯގެ އަގަކަށް ކަމަށް މީޑިއާ ރިޕޯޓްތަކުގައިވެއެވެ.
ބެލެވޭގޮތުގައި ބާސެލޯނާއިން ބްރެޒިލްގެ މެލްކޮމް އަށް ޝައުޤުވެރިކަން ފާޅުކުރީ އެކްލަބުން ޗެލްސީގެ ވިލިއަން ހޯދުމަށްޓަކައި ކުރަމުން އައި މަސައްކަތަށް ކުރިއެރުމެއް ނުލިބުމުންނެވެ. އެގޮތުން، ބާސެލޯނާ އިން މިހާތަނަށް ވިލިއަން ގެންދިއުމަށް ހުށަހެޅި އެއްވެސް އަގަކަށް ޗެލްސީއިން ވަނީ ވިއްކުމަށް ދެކޮޅުހަދާފައެވެ.
ބޯޑޯގައި ހޭދަކުރި ދެ އަހަރުގެ މުއްދަތުގައި އެކްލަބާއިއެކު ތަށްޓެއް ހޯދިފައިނުވީނަމަވެސް މެލްކޮމް ވަނީ އެކުލަބަށް ކުޅެދިން 84 މެޗުގައި 20 ގޯލު ކާމިޔާބުކޮށްދީ 13 ލަނޑުޖެހުމަށް އެހީވެދީފައެވެ.