މިއީ ކޯޗެއްކަން އެނގޭ މީހަކު އެބަހުރިތަ؟ މިއީ ސޯޝަލް މީޑިޔާގައި ކަންބޮޑުވުމާ އެކު މި ފޮޓޯ ހިއްސާކުރި މީހާގެ ސުވާލެވެ. ލިންކް ރޯޑުގެ މެދުގައި ޕޭވްމަންޓް ގާތަކެއްގެ މަތީގައި ކޯނެއް ބަހައްޓާފައި މިހުރީ ކީއްކުރަން ހެއްޔެވެ؟
ހައުސިން އައްޑޫ ޑިޕާޓްމަންޓްގެ އޮފިޝަލަކު ބުނިގޮތުގައި އެތަނުގައި އެގޮތަށް ކޯނު ބެހެއްޓީ އެ ޑިޕާޓްމަންޓުގެ މުވައްޒަފުން ކަމަށެވެ.
ކޯނު އެގޮތަށް ބެހެއްޓީ ލިންކް ރޯޑުގައި ހުރި ބޮޑުވަޅުގަނޑެއް ފާހަގަކުރުމަށް ކަމަށް ނަން ހާމަނުކުރުމަށް ޝަރުތުކޮށް ވާހަކަ ދެއްކި ހައުސިން މިނިސްޓްރީ އައްޑޫ ޑިޕާޓްމަންޓުގެ މުވައްޒަފު ވަނީ ބުނެފައެވެ.
" ޕޭވްމަންޓް ގާތަކެއްގެ މަތީގައި ބެހެއްޓީ ފެންގަނޑުގެ ބޮޑުވުމުން، ކޯނު ސީދާ ވަޅުގަނޑު ހުރި ތަނުގައި ބަހައްޓަން ވެގެން" އޭނާ ބުންޏެވެ.
މިލިއަނަކަށް ވުރެ ގިނަ ރުފިޔާ ޚަރަދުކޮށްގެން އައްޑޫ ލިންކް ރޯޑު މަރާމާރު ކުރުމުގެ މަސައްކަތް ނިންމާލި ކަމަށް ސަރުކާރުން ވަނީ ބުނެފައެވެ. ތަރައްޤީގެ މަޝްޜޫޢުތަކާޢި ބެހެގޮތުން ސަރުކާރުން އާއްމު ކުރި ތަފާސް ހިސާބުތަކުގައި ބުނެެފައިވާ ގޮތުގައި، ލިންކް ރޯޑު މަރާމާތު ކުރުމުގެ މަޝްރޫޢު ވަނީ ނިންމާލާފައެވެ.
ސަރުކާރުން އެ މަޝްރޫޢު ނިންމާލިޔަސް މިފަދަ އެތައް ވަޅުގަނޑެއް ލިންކް ރޯޑުގެ އެކި ހިސާބުތަކުގައި އެބަހުއްޓެވެ. ފޮޓޯ އިން އެފެންނަ ކޯނު އެތަނުގައި ބެހެއްޓީ ލިންކް ރޯޑު މަރާމާތުކޮށް ނުނިމޭ ކަމާއި ވަޅުގަނޑުތައް އަދިވެސް ހުރިކަން ހައުސިންގެ އައްޑޫ ޑިޕާޓްމަންޓުގެ މުވައްޒަފުންނާއި އިސްވެރިންނަށް އެނގޭތީއެވެ.