މެއި މަހުގެ 12 ވަނަ ދުވަހު ބޭއްވި ހަފްލާއެއްގައި ރައީސް އަބްދުﷲ ޔާމީން ވިދާޅުވި ގޮތުގައި، ރިޔާސީ އާ ދައުރަކަށް ރައްޔިތުންނަށް އެމަނިކުފާނު ހުށަހަޅުއްވާނީ "ސަޕްރައިޒެއް" ފަދަ މެނިފެސްޓޯއެކެވެ. ރޯދަމަސް ފެށެން ކުޑަ ދުވަސްކޮޅަކަށް ވެފައި ވަނިކޮށް ބޭއްވި އެ ޖަލްސާގައި ޔާމީން ވިދާޅުވީ، "ކުރިއަށް އޮތީ ރޯދަ މަސް ކަމަށް ވާއިރު އީދުގެ ކުރިން، މެނިފެސްޓޯ ހަދިޔާ ކުރައްވަން ބޭނުންފުޅު ނުވާ" ކަމަށެވެ. އަދި ރައްޔިތުންނަށް "މެނިފެސްޓޯ ދެއްވާނީ އީދަށް ފަހު" ކަމަށެވެ.
ރޯދަމަސް ނިމި ޢީދު ވެސް ނިމިއްޖެއެވެ. އެހެން ނަމަވެސް ރައީސް ޔާމީން ވިދާޅުވި "ސަޕްރައިޒް" މެނިފެސްޓޯ ރައްޔިތުންނަކަށް ނުފެނެއެވެ. އެ މެނިފެސްޓޯ އިއުލާން ކުރާނެ ތާރީޚެއް ވެސް އެފަހުން ރައީސް ޔާމީން ވިދާޅެއް ނުވެއެވެ.
ފިތުރު ޢީދަށް ފަހު ރައީސް ޔާމީން ހަދިޔާ ކުރައްވާނެ ކަމަށް ވިދާޅުވި "ސަޕްރައިޒް" މެނިފެސްޓޯ ރައްޔިތުންނާއި ހަމައަށް ގެނެސް ނުދެވެނީސް އަޟްޙާ ޢީދު ވެސް މިވަނީ ބޯމަތިވެފައެވެ. އަދި ރިޔާސީ އިންތިޚާބަށް ވެސް ފަސްދޮޅަހަކަށް ދުވަހަށް ވެއްޖެއެވެ.
"ސަޕްރައިޒް" މެނިފެސްޓޯ ކޮބައިހެއްޔެވެ؟ ރައީސް ޔާމީން އެ މެނިފެސްޓޯ އާއްމު ނުކުރައްވަނީ 2013 ވަނަ އަހަރު ރައްޔިތުންނަށް ދެއްކެވި މެނިފެސްޓޯގައި ހުރި ކަންތައް ފުރިހަމަ ނުވާތީ ހެއްޔެވެ؟
2018 ވަނަ އަހަރަށް އާ މެނިފެސްޓޯއެއް އިއުލާން ނުކުރައްވައި ލަސްކުރައްވަނީ، "ބެޔަސް ނުބެޔަސް ދިހަ ހާސް"، "ރިސޯޓު ހިއްސާ ރިސޯޓު މުވައްޒަފުންނަށް" އަދި "ކޮންމެ އަތޮޅަކަށް ހުޅުމާލެ" ފަދަ 2013 މެނިފެސްޓޯގައި ހުރި ވާހަކަތަކުގެ އަޑު ގަދަވެދާނެތީ ކަމަށް ވެދާނެއެވެ.