އަންނަ އޯގަސްޓްމަހުގެ 18 ވަނަ ދުވަހު ފެށުމަށް ހަމަޖެހިފައިވާ ސްޕެނިޝް ލަލީގާގެ އާ ސީޒަނުގެ މެޗް ޝެޑިއުލް ނެރުނުއިރު ދުނިޔޭގެ އެންމެ ގިނަ ބަޔަކު އިންތިޒާރުކުރާ އެލްކްލެސިކޯގެ ފުރަތަމަ މެޗު ކުޅެވޭނީ އަންނަ އޮކްޓޫބަރުމަހުގެ 28 ވަނަ ދުވަހު ބާސެލޯނާގެ ކޭމްޕް ނޯ ގައެވެ.
ރެއާލް އަދި ބާސެލޯނާ ބައްދަލުކުރާ އެލްކްލެސިކޯގެ ދެވަނަ މެޗު ކުޅުމަށް ހަމަޖެހިފައިވަނީ 2019 ވަނަ އަހަރުގެ މާރިޗް މަހުގެ ތިންވަނަ ދުވަހު ރެއާލްގެ ސެންޓިއާގޯ ބާނެބެއޫ ސްޓޭޑިއަމްގައެވެ.
އެންމެ ފަހުގެ ޗެމްޕިއަން ބާސެލޯނާ ކުޅޭ ފުރަތަމަ މެޗުގައި އޯގަސްޓްމަހުގެ 19 ވާ އާދީއްތަ ދުވަހު ނިކުންނާނީ އަލަވޭސް އާއި ދެކޮޅަށެވެ. މިމެޗު ކުޅެވޭނީ ބާސާގެ ކޭމްޕް ނޯ ގައެވެ.
ޔޫރަޕްގެ ޗެމްޕިއަން ރެއާލް މެޑްރިޑް ކުޅޭ ފުރަތަމަ މެޗުގައި ގެޓާފޭ އާއި ދެކޮޅަށް އަމިއްލަ ދަނޑުގައި ނިކުންނައިރު އެހަފްތާގައި ކުޅޭ ބޮޑު މެޗުގައި އެތުލެޓިކޯ މެޑްރިޑް ރަށުންބޭރުގައި ނިކުންނާނީ ވެލެންސިއާ އާ ދެކޮޅަށެވެ.
ލަލީގާގެ ފުރަތަމަ ހަފްތާގައި ކުޅޭ އިތުރު މެޗުތަކަށް ބަލައިލާއިރު ސެލްޓާވިގޯ އާއި ދެކޮޅަށް އެސްޕަންޔޯލް ކުޅޭ މެޗާއި ވިޔަރެއާލް އާއި ރެއާލް ސޮސިއެޑާޑް ބައްދަލުކުރާ މެޗު ފާހަގަކޮށްލެވެއެވެ.