ސަރުކާރުން ހާމަކޮށްފައިވާ ގޮތުގައި އައްޑޫ ސިޓީ މަރަދޫފޭދޫގެ ބަނދަރުގެ މަސައްކަތް "ކުރިއަށް ދަނީ"އެވެ. އެ މަސައްކަތް ކުރިއަށްދާ މަންޒަރެއް މަރަދޫފޭދޫ އަތިރިމައްޗަށް ނިކުމެ ހުރެ ހޯދާ ވަރުބަލިވީ އިރު ވެސް ފެންނަ ގޮތެއް ނުވިއެވެ.
ފަހަރެއްގައި މަސައްކަތް މެދުކަނޑާލާފައި އޮތް ގަޑިއެއް ކަމަށް ވެދާނެތީ، އެ ހިސާބުގައި ހުރި ދޮށީ އުމުރުގެ މީހެއް ކައިރިން ސުވާލުކޮށްލީމެވެ.
އެމީހާ ބުނިގޮތުގައި މަރަދޫފޭދޫ އަތިރިމަތީގައި ކޮންމެ ދުވަހަކު ވެސް ގިނަ ވަގުތު އޭނާ ހޭދަކުރެއެވެ. އެހެން ނަމަވެސް މަރަދޫފޭދޫ ބަނދަރު ހަދަން މަސައްކަތް ކުރި މަންޒަރެއް ނުދެކޭ ކަމަށެވެ.
މަރަދޫފޭދޫ ގިނަ ބަޔަކާއި ސުވާލުކޮށްގެން ވެސް އެރަށު ބަނދަރު ހަދަން މަސައްކަތް ކުރާ މަންޒަރު ފެންނަ މީހަކާއި ދިމާވާ ގޮތެއް ނުވިއެވެ.
ބަނދަރުގެ މަސައްކަތް ކުރިއަށްދާ ކަމަށް ބުނީ ޕީޕީއެމް އަށް ނިސްބަތްވާ މީހުންގެ ތެރެއިން 'އައްޑޫލައިވް' އާއި ވާހަކަ ދެއްކި 10 މީހުންގެ ތެރެއިން އެންމެ މީހެކެވެ. އޭނާ ފޯނު ނަގާފައި ދައްކާލީ ހައުސިން މިނިސްޓަރު ޑރ.މުއިއްޒު މަރަދޫ ބަނދަރު ސަރަހައްދުގައި ހުންނަވަނިކޮށް ނަގާފައިވާ ފޮޓޯއެކެވެ.
އެ ފޮޓޯ އަކީ މުއިއްޒު އައްޑޫއަށް ކުރެއްވި ދަތުރުފުޅެއްގައި މަރަދޫފޭދޫ ބަނދަރުގެ ހާލަތު ބައްލަވާލެއްވުމަށް އެ ސަރަހައްދަށް ވަޑައިގެން އުޅުއްވަނިކޮށް ނަގާފައިވާ ފޮޓޯއެވެ.
މުއިއްޒު މަރަދޫފޭދޫ ބަނދަރު ބައްލަވާލެއްވުމުން އެ ބަނދަރު ހެދުމުގެ މަޝްރޫޢު ފެށުނީ ކަމަށް ވެދާނެއެވެ. ނުވަތަ އެ މަސައްކަތް ކުރިއަށް ދަނީ މައުނަވީ ގޮތެއްގައި ކަމަށް ވެސް ވެދާނެއެވެ.
އައްޑޫލައިވް އާއި ވާހަކަ ދައްކަމުން މަރަދޫފޭދޫގައި ޕީޕީއެމްގެ ހަރަކާތްތަކުގައި އެންމެ އިސްކޮށް އުޅޭ، ޔޫތް މިނިސްޓްރީގެ ކޯޑިނޭޓަރު މަސީހު ބުނިގޮތުގައި އެރަށު ބަނދަރުގެ މަސައްކަތް މިހާރު ކުރިއަށް ނުދެއެވެ.
އެހެން ނަމަވެސް މަސީހު ބުނިގޮތުގައި ބަޖެޓުގައި އެ ބަނދަރު ހެދުމަށް ފައިސާ ހިމަނާފައިވާ ކަމަށާއި އެހެންވެ މިއަހަރުގެ ތެރޭގައި ބަނދަރު ހެދުމުގެ މަސައްކަތް ފެށޭނެ ކަމަށް އުއްމީދު ކުރާ ކަމަށެވެ.
ސުވާލަކީ މަރަދޫފޭދޫ ބަނދަރުގެ މަސައްކަތް ކުރިއަށް ނުދަނީސް އެ މަޝްރޫޢު ކުރިއަށް ދަނީ ކަމަށް ހާމަކޮށްފައި ވަނީ ކީއްވެގެން ހެއްޔެވެ؟