ދުނިޔޭގެ ފުޓްބޯޅައިގެ މައި އިދާރާކަމަށްވާ ފީފާ އިން ހޮވާ މޮޅު ކުޅުންތެރިޔާގެ މަޤާމަށް ނޮމިނޭޓްވެފައިވާ 10 ކުޅުންތެރިންގެ ނަން އިޢުލާންކޮށްފައިވާއިރު އެ ލިސްޓްގައި ބްރެޒިލްގެ ނޭމާ ނުހިމެނެއެވެ.
ފީފާ އިން ދިނުމަށް ހަމަޖެހިފައިވާ އެވޯޑްތަކުގެތެރޭގައި އެންމެ މޮޅު ފިރިހެން ކުޅުންތެރިޔާގެ މަޤާމާއި އަންހެން ކުޅުންތެރިޔާގެ މަޤާމްގެ އިތުރުން އެންމެ މޮޅު ފިރިހެން އަދި އަންހެން ކޯޗުގެ މަޤާމްވެސް ހިމެނެއެވެ.
މިހުރިހާ މަޤާމެއްވެސް ހޮވުމަށް ހަމަޖެހިފައިވަނީ ވޯޓް ދީގެންނެވެ. އެގޮތުން މިއަދުން ފެށިގެން އޯގަސްޓްމަހުގެ 10 ވަނަ ދުވަހާއި ހަމައަށް އާއްމުންގެ ވޯޓަށް ހުޅުވާލެވިފައިވާއިރު، ކޯޗުންނާއި ޤައުމީ ޓީމްގެ ކެޕްޓަނުން އަދި ދުނިޔޭގެ އެކި ގައުމުތަކަށް ނިސްބަތްވާ ނޫސްވެރިންގެ ވޯޓަށް ހުޅުވާލެވޭނީ މިއިން ކޮންމެ ކެޓަގަރީއަކުން ނޮމިނޭޓްވެފައިވާ ފަރާތްތައް ޝޯޓްލިސްޓްކުރުމަށްފަހު އަންނަ ސެޕްޓެންބަރުމަހުގެ ފުރަތަމަ ހަފްތާގައެވެ.
ފީފާގެ އެންމެ މޮޅު ފިރިހެން ކުޅުންތެރިޔާގެ އެވޯޑަށް ވާދަކުރާ 10 ކުޅުންތެރިންގެ ލިސްޓްގައި އެންމެ ގިނަ އަދަދަކަށް ހިމެނެނީ ދުނިޔޭގެ ޗެމްޕިއަން ފްރާންސްގެ ކުޅުންތެރިންނެވެ. އެޓީމުގެ ތިން ކުޅުންތެރިން ހިމެނޭއިރު ދެވަނައަށް އެންމެ ގިނަ އަދަދަކަށް ހިމެނޭ ބެލްޖިއަމްގެ ދެ ކުޅުންތެރިން ވަނީ މިލިސްޓުން ޖާގަ ހޯދާފައެވެ.
އެއްކުލަބަކަށް ނިސްބަތްވާ އެންމެ ގިނަ ކުޅުންތެރިން ހިމެނެނީ ޔޫއެފާ ޗެމްޕިއަންސް ލީގުގެ ތަށި ހޯދި ރެއާލް މެޑްރިޑުންނެވެ. އެޓީމަށް ނިސްބަތްވާ ތިން ކުޅުންތެރިން ހިމެނިފައިވާއިރު ބާސެލޯނާ، މެންޗެސްޓަރ ސިޓީ، އެތުލެޓިކޯ މެޑްރިޑް، ޕީއެސްޖީ، ލިވަޕޫލް އަދި ޗެލްސީގެ އިތުރުން ޓޮޓެންހަމް ހޮޓްސްޕާގެ އެއް ކުޅުންތެރިއަކު ހިމެނިފައިވެއެވެ.
ރެއާލަށް ޔޫރަޕްގެ ޗެމްޕިއަންކަން ހޯދައިދިނުމަށްޓަކައި ގިނަ ގޯލްތަކެއް ޖަހައިދިން ކްރިސްޓިއާނޯ ރޮނާލްޑޯގެ އިތުރުން ވާދަވެރި ބާސެލޯނާ އަށް ލީގު އަދި ކޮޕާ ޑެލް ރޭ ތަށި ކާމިޔާބުކޮށްދިނުމުގައި މުޙިއްމު ދައުރެއް އަދާކުރި ލިއޮނަލް މެސީ ވެސް ވަނީ މިލިސްޓުގައި ހިމެނިފައެވެ.
އެންމެފަހުގެ ވޯލްޑްކަޕްގައި ރަނގަޅު ކުޅުމެއް ދެއްކިފައިނުވާ ބްރެޒިލްގެ ކެޕްޓަން ނޭމާ އަށް މި ލިސްޓުން ޖާގަ ލިބިފައިނުވީނަމަވެސް އޭނާއާއި އެކު ޕީއެސްޖީގައި ކުޅެމުންދާ ފްރާންސްގެ ޒުވާން ކުޅުންތެރިޔާ ކިލިއަން އެމްބާޕޭ ވަނީ ވޯލްޑްކަޕްގައި ދެއްކި މޮޅު ކުޅުމުގެ ސަބަބުން ގަދަ 10 ގައި ހިމެނިފައެވެ.
އޭގެއިތުރުން ފްރާންސަށް ވޯލްޑްކަޕް ހޯދައިދިނުމުގައި މުހިއްމު ދައުރެއް އަދާކުރި އެންޓޮއިން ގްރީޒްމަން އާއި ރަފައެލް ވަރާން ވެސް ވަނީ މިލިސްޓުން ޖާގަ ހޯދާފައެވެ. ސްޕެއިނުގެ އެތުލެޓިކޯ މެޑްރިޑުން ޔޫރޮޕާ ލީގު ހޯދިއިރު ރަނގަޅު ކުޅުމެއް ގްރީޒްމަންގެ ފަރާތުން ފެނިގެންދިޔައިރު ރެއާލް އިން ޔޫއެފާ ޗެމްޕިއަންސް ލީގު ކާމިޔާބުކުރިއިރު އެޓީމްގެ ޑިފެންސްގައި ވަރާން ވަނީ މޮޅުކުޅުމެއް ދައްކާފައެވެ.
ބެލްޖިއަމް އަށް ވޯލްޑްކަޕްގައި ތިންވަނަ މަޤާމް ހޯދައިދިނުމުގައި އިސް ދައުރެއް އަދާކުރި އެޑެން ހަޒާޑް އަދި ކެވިން ޑިބްރައިނާ ވެސް ވަނީ މޮޅު ކުޅުންތެރިޔާގެ އެވޯޑަށް ނޮމިނޭޓްވެފައެވެ. ޑިބްރައިނާ ވަނީ އިނގިރޭސި ޕްރިމިއާ ލީގު އަދި ކަރަބާއޯ ކަޕްގެ ތަށި މެންޗެސްޓަރ ސިޓީ ކާމިޔާބުކުރިއިރު މޮޅުކުޅުމެއް ދައްކާފައެވެ.
ކްރޮއޭޝިއާ ވޯލްޑްކަޕްގެ ފައިނަލަށް ގެންގޮސްދިނުމުގެ އިތުރުން ޔޫއެފާ ޗެމްޕިއަންސް ލީގުގެ ތަށި ސްޕެއިނުގެ ރެއާލް މެޑްރިޑަށް ކާމިޔާބުކޮށްދިނުމުގައި މުހިއްމު ދައުރެއް އަދާކުރި މިޑްފީލްޑަރު ލޫކާ މޮޑްރިޗް ވެސް ވަނީ މޮޅުކުޅުންތެރިޔާގެ އެވޯޑަށް ނޮމިނޭޓްވެފައެވެ.
ފީފާގެ މޮޅުކުޅުންތެރިޔާގެ އެވޯޑަށް ވާދަކުރާ ކުޅުންތެރިންތަކުގެ ތެރޭގައި، ވޯލްޑްކަޕްގެ ސެމީ ފައިނަލަށް އިންގްލެންޑް ގެންގޮސްދިނުމުގައި މުހިއްމު ދައުރެއް އަދާކޮށް އެމުބާރާތުގެ ރަންބޫޓް ހޯދި ހެރީ ކޭން ވެސް ހިމެނެއެވެ.
މީގެއިތުރުން، އިނގިރޭސިވިލާތުގެ ލިވަޕޫލަށް ޗެމްޕިއަންސް ލީގުގެ ޖާގައެއް ކަށަވަރުކޮށްދިނުމަށްޓަކައި ގިނަ ގޯލްތަކެއް ޖަހައިގެން ޕްރިމިއާ ލީގުގެ ރަންބޫޓް ހޯދި މިސްރުގެ ތަރި މުހައްމަދު ސަލާހު ވެސް ވަނީ ގަދަ 10 ގައި ހިމެނިފައެވެ.
ފީފާގެ އެވޯޑް ދިނުމުގެ ހަފްލާ ބޭއްވުމަށް ހަމަޖެހިފައިވަނީ އަންނަ ސެޕްޓެންބަރު މަހުގެ 24 ވަނަ ދުވަހު އިނގިރޭސިވިލާތުގެ ލަންޑަންގައެވެ.