ރައީސް އަބްދުﷲ ޔާމީން ދެވަނަ ދައުރަކަށް ހޮވަންޖެހޭ ސަބަބުތައް ގިނަވެގެން ގޮސް އެ ސަބަބުތައް ކިޔަން ވެސް ނޭނގޭ މިންވަރަށް އިތުރުވެފައިވާ ކަމަށް ބިލެތްދޫ ދާއިރާގެ މެމްބަރު އަހްމަދު މުބީން ވިދާޅުވެއްޖެއެވެ.
މުބީން މިހެން ވިދާޅުވީ މިރޭ މާލޭގައި ޕީޕީއެމުން އާ ޖަގަހައެއް ހުޅުވުމަށް ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ.
އެ ރަސްމިއްޔާތުގައި ވާހަކަ ދައްކަވަމުން މުބީން ވިދާޅުވި ގޮތުގައި ރާއްޖޭގެ ހުރިހާ ހިސާބަކުން އެއް އަޑަކުން ގޮވަމުން ދަނީ "ރައީސް ޔާމީން ދެވަނަ ދައުރަކަށް ހޮވަންޖެހޭނެ" ވާހަކަ ކަމަށެވެ.
އަދި ރައީސް ޔާމީން ދެވަނަ ދައުރަކަށް ހޮވަން ޖެހޭ ސަބަބުތައް ގިނަކަން ފާހަގަކުރައްވައި ވާހަކަ ދައްކަވަމުން މުބީން ވިދާޅުވީ، "ހޮވަން ޖެހޭ ސަބަބުތައް އިންތިހާއަށް ގިނަ ވެގެން ގޮސްފައިވާ ކަމަށެވެ.
އެގޮތުން ރައީސް ޔާމީން ހޮވަންޖެހޭ ސަބަބުތައް އިތުރުވެގެން ގޮސްފައިވާ މިންވަރުން "އަޅުގަނޑުމެންނަށް ކިޔާ ނުކިޔޭ ނޭނގޭ މިންވަރަށް ސަބަބުތައް އިތުރުވެއްޖެ" ކަމަށް މުބީން ވަނީ ވިދާޅުވެފައެވެ.