ރައީސް އަބްދުﷲ ޔާމީން އަށް ވޯޓު ދޭން ޖެހޭ ވަރަށް ނުރައްކާތެރި ސަބަބުތައް އެބަހުރި ކަމަށް އައްޑޫ އިންޓަނޭޝަނަލް އެއާޕޯޓު (އޭއައިއޭ)ގެ މެނޭޖިން ޑިރެކްޓަރު މުހައްމަދު ލަތީފް ވިދާޅުވެއްޖެއެވެ.
ލަތީފް މިހެން ވިދާޅުވީ މިރޭ މާލޭގައި ޕީޕީއެމުން އަތޮޅު ތެރޭގެ ރައްޔިތުންނަށް ޚާއްސަކޮށް ހަދާފައިވާ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ރައީސް ޔާމީނަށް ވޯޓު ދޭންޖެހޭ ނުރައްކާތެރި ސަބަބުތަކެއް ގޮތުގައި ލަތީފް ފާހަގަކުރެއްވީ މައިގަނޑު ގޮތެއްގައި ދެ ކަމެކެވެ. އެއީ "އެމްއެންޑީއެފް އުވާލުމަށް" އިދިކޮޅު ފަރާތްތަކުން ދައްކާ ވާހަކަ އާއި އަދި ރާއްޖޭގެ ކޯޓުތަކަށް ބޭރުގެ ފަނޑިޔާރުން އައްޔަން ކުރުމަށް ކުރާ މަސައްކަތާއި ދެކޮޅު ހަދަން ކުރަން ޖެހިފައިވާ މަސައްކަތެވެ.
ލަތީފު ވިދާޅުވި ގޮތުގައި އެކަންތައް ހުއްޓުވުމަށް ރައީސް ޔާމީނަށް ވޯޓު ދޭން ޖެހޭ ކަމަށެވެ.
މީގެ އިތުރުން ލަތީފް ވިދާޅުވި ގޮތުގައި ރައީސް ޔާމީން ރާއްޖޭގެ އިގްތިސާދު ކުރިއެރުވުމަށާއި އަދި ތަރައްޤީ އަށް ކުރަމުންދާ މަސައްކަތުގެ ސަބަބުން ވެސް އެމަނިކުފާނަށް ވޯޓު ދޭން ޖެހެއެވެ.