ބައި ގަރުނަށް ވުރެ ގިނަ ދުވަސްވަންދެން އަމަލުކުރަން ދިޔަ ގާނޫނުލް އުގޫބާތު އުވާލުމަށް ފަހު ޒަމާނީ ގާނޫނުލް އުގޫބާތެއް ރާއްޖެއަށް ގެނައީ މީގެ 3 އަހަރު ކުރިން 2014 ވަނަ އަހަރުއެވެ. އެ މަސައްކަތަކީ ގާތްގަނޑަކަށް 10 ވަރަކަށް އަހަރު ދުވަހުގެ ބުރަ މަސައްކަތެވެ.
ރާއްޖޭގައި މިހާރު އަމަލުކުރަމުންދާ އާ ގާނޫނުލް އުޤޫބާތު އެކުލަވާލުމުގެ މަސައްކަތުގައި އެމެރިކާގެ ޕްރޮފެސަރަކު އިސްކޮށް މަސައްކަތް ކުރި އިރު އެކަމުގައި ރާއްޖޭގައި ތިއްބެވި ޤާނޫނީ ދާއިރާގެ ތަޖުރިބާކާރުން ވެސް ބައިވެރިވެ ވަޑައިގެންނެވިއެވެ.
އެހީތެރިކަމާ އެކު އެކުލަވާލި އާ ގާނޫނުލް އުގޫބާތަކީ ރާއްޖޭގައި މިހާތަނަށް ހެދި އެންމެ ބޮޑު ގާނޫނެކެވެ. 2014 ގައި ތަސްދީގުކޮށް، 2015 ގައި އަމަލުކުރަން ފެށި އާ ގާނޫނުލް އުގޫބާތާއި އެކު ޖިނާއީ އަދުލުގެ ނިޒާމަށް ބޮޑެތި ބަދަލުތަކެއް އައެވެ. އެ ބަދަލުތަކަށް ދައުލަތުގެ އިދާރާތައް އަހުލުވެރި ކުރުމަށް ޔޫއެންޑީޕީގެ އެހީތެރިކަމާއި އެކު ބުރަ މަސައްކަތްތަކެއް ވެސް ވަނީ ކޮށްފައެވެ.
ބުރަ މަސައްކަތްތަކާއި އެކު އެކުލަވާލި ޤާނޫނުލް އުޤޫބާތަށް އިސްލާޙުތަކެއް ހުށަހަޅަން ސަރުކާރުގެ ފަރާތުން މިވަނީ ނިންމާފައެވެ. އެ އިސްލާޙުތައް ސަރުކާރުގެ ފަރާތުން މަޖިލީހަށް ހުށަހެޅިތާ 2 ހަފްތާގެ ތެރޭގައި އެ އިސްލާހުތައް މަޖިލީހުގެ ކޮމިޓީ މަރުހަލާއިން ވަނީ ފާސްކޮށްފައެވެ.
10 އަހަރުގެ ބުރަ މަސައްކަތުން ޤާނޫނީ ދާއިރާގެ ބޭފުޅުން ކުރެއްވި ބުރަ މަސައްކަތް ބަދަލުކޮށްލުމަށް މަޖިލީހުގެ ކޮމިޓީން ނިންމީ އެންމެ 5 މިނިޓްގެ ތެރޭގައެވެ. އެކަން މަޖިލީހުގެ ޤައުމީ ސަލާމަތާއި ބެހޭ ކޮމިޓީން ޖުލައި މަހުގެ 23 ވަނަ ދުވަހު ބޭއްވި ބައްދަލުވުމުގެ ރިޕޯޓުން އެނގެއެވެ.
ޤާނޫނުލް އުޤޫބާތަށް ހުށަހެޅި އިސްލާހުތައް ކޮމިޓީ މަރުޙަލާގައި ދިރާސާކުރުމަށް 5 މިނިޓަށް ކުރިއަށް ގެންދިޔަ ކޮމިޓީގައި 11 މެންބަރަކު ބައިވެރިވެ ވަޑައިގެންނެވިއެވެ.
އެ މެންބަރުންނަކީ، މިލަންދޫ ދާއިރާގެ މެންބަރު ޙަސަން މުފީދް، ގުރައިދޫ ދާއިރާގެ މެންބަރު އިބްރާހިމް ރިޒާ، ފޭދޫ ދާއިރާގެ މެންބަރު އިބްރާހިމް ދީދީ، ގެމަނަފުށީ ދާއިރާގެ މެންބަރު ޖަމީލް އުޘްމާން، މަނަދޫ ދާއިރާގެ މެންބަރު އުމަރު ހުސައިން، ހިތަދޫ މެދު ދާއިރާގެ މެންބަރު އިބްރާހިމްދީދީ، ވެލިދޫ ދާއިރާގެ މެންބަރު އަބްދުﷲ ޔާމީން، ހުޅުހެންވޭރު ދާއިރާގެ މެންބަރު މޫސާ މަނިކު، މާވަށު ދާއިރާގެ މެންބަރު މޫސާ މަނިކު، މާވަށު ދާއިރާގެ މެންބަރު އަޒްހާން ފަހުމީ، ތޮއްޑޫ ދާއިރާގެ މެންބަރު އިބްރާހިމް ހަސަން އަދި މުލަކު ދާއިރާގެ މެންބަރު އިބްރާހިމް ނަސީރެވެ.
އެތައް އަހަރެއްގެ މަސައްކަތުން ވުޖޫދަށް ގެނައި ގާނޫނުލް އުގޫބާތަށް ބޮޑެތި އިސްލާހުތަކެއް ގެންނާތީ ޤާނޫނީ ދާއިރާގެ ބޭފުޅުން ދަނީ ކަންބޮޑުވުން ފާޅުކުރަމުންނެވެ. އެކަމަކު އެ ކަންބޮޑުވުމެއް މަޖިލީހުގައި އެ އިސްލާހުތައް ދިރާސާ ކޮމިޓީގެ މެންބަރުންގެ ނެތެވެ.
އެންމެ 5 މިނިޓުން އެ ހުރިހާ އިސްލާހުތައް ދިރާސާކޮށް ނިންމާލުމަކީ އޭގެ ހެއްކެކެވެ.