ލަންޑަން، އިންގްލެންޑް: އިިނގިރޭސި ޤައުމީޓީމުގެ ކުރީގެ ގޯލްކީޕަރު ރޮބް ގްރީން ވަނީ ފްރީ ޓްރާންސްފާގައި ޗެލްސީ އަށް ބަދަލުވެފައެވެ.
އުމުރުން 38 އަހަރުގެ ރޮބަޓް ގްރީން ވަނީ ޗެލްސީ އާއި އެކު އެއްއަހަރު ދުވަހުގެ ކޮންޓްރެކްޓެއްގައި ސޮއިކޮށްފައެވެ.
މީގެކުރީން، ލީޑްސް ޔުނައިޓެޑް، ކުއީންސް ޕާކް ރޭންޖާސް އާއި ވެސްޓްހޭމް ޔުނައިޓެޑްގެ އިތުރުން ނޯވިޗް ސިޓީއަށް ކުޅެފައިވާ ގްރީން އެންމެފަހުން ފެނިގެންދިޔައީ މިދިޔަ ސީޒަނުގައި އަލަށް ޕްރިމިއާ ލީގަށް ޕްރޮމޯޓްވި ހަޑަސްފީލްޑް ޓައުން އިންނެވެ.
އޭނާ ވަނީ އިނގިރޭސި ޤައުމީޓީމަށްވެސް 2005 ވަނަ އަހަރުން ފެށިގެން 2012 ވަނަ އަހަރުގެ ނިޔަލަށް 12 މެޗު ކުޅެދީފައެވެ.
އެންމެފަހުގެ މީޑިއާ ރިޕޯޓްތައް ބުނާގޮތުގައި ޗެލްސީގެ އެއްވަނަ ކީޕަރު ތިބޯ ކޯޓުއާ، ސްޕެއިނުގެ ރެއާލް މެޑްރިޑަށް ވިއްކާލުމަށް އެއްބަސްވެފައިވާކަމަށްވެއެވެ. އެކަމުގެ ސަބަބުން ޗެލްސީއަށް އަދި އިތުރު ގޯލްކީޕަރެއް ގެނައުމަށް މަސައްކަތްކުރާކަމަށާއި އެގޮތުން މިލާންގެ ކީޕަރު ޖިއާންލުއިޖީ ޑޮނަރުއްމާ އާއި ލެސްޓާ ސިޓީގެ ކީޕަރު ކެސްޕާ ޝޫމެއިކަލް ގެންދިއުން އެކަށީގެންވާކަމަށްވެއެވެ.
މީގެއިތުރުން، ޗެލްސީ އިން ވަނީ ނިމިދިޔަ ވޯލްޑްކަޕްގައި ރަޝިޔާގެ ޓީމުގައި މޮޅުކުޅުމެއް ދެއްކި އެލެކްސެންޑަރ ގޮލޯވިން ގެންދިއުމަށް ކުރި މަސައްކަތް ނާކާމިޔާބުވުމުން ބޭޔާ ލެވަކޫސަން އަށް ކުޅޭ ޖެމެއިކާގެ ޒުވާން ކުޅުންތެރިޔާ ލިއޯން ބެއިލީ ގެންދިއުމަށް ޝައުޤުވެރިކަން ފާޅުކޮށްފައެވެ.
އެންމެފަހުގެ ޚަބަރުތަކުން ބުނާގޮތުގައި، ރަޝިޔާގެ ކްލަބު ސީއެސްކޭއޭ މޮސްކޯ އަށް ކުޅެމުން އައި ގޮލޯވިން ވަނީ ޗެލްސީގެ ހުށަހެޅުމަށް ފުރަގަސްދިނުމަށްފަހު ފްރާންސްގެ މޮނާކޯ އަށް ބަދަލުވުމަށް އެއްބަސްވެފައެވެ.