ރައީސް އަބްދުﷲ ޔާމީންގެ ވެރިކަމުގެ ފުރަތަމަ ދައުރު ނިމެން ބާކީ އޮތީ، ކުޑަ ދުވަސްކޮޅެކެވެ. އެމަނިކުފާނުގެ ފަރާތްޕުޅުން މަންދޫބުން ގެންދަނީ ރައްޔިތުންނާއި ހަމައަށް ގޮސް އިތުރު ދައުރެއް ދިނުމަށް އެދެމުންނެވެ. އޭގެ ސަބަބެއް ކަމަށް އެމީހުން ބުނަނީ "ރާއްޖެއަށް ރައީސް ޔާމީން ގެނެސްދެއްވަމުން ގެންދަވާ ތަރައްޤީ"އެވެ.
ފޮތްތަކާއި ވެބްސައިޓްތަކުގައި ސަރުކާރު ރައްޔިތުން ސިއްސައިގެން ދާ ވަރުގެ ބޮޑެތި އަދަދުތައް ޖައްސަވައި ގެންދަވަނީ ކަންތައް ކޮށްދީފައިވާ ކަމަށް ބުނަމުންނެވެ. އެހެނަސް އޭގެ ތެރެއިން ގިނަ ކަންކަން ރައްޔިތުންގެ ލޮލަށް ވެސް ފެންނަކާށް ނެތެވެ.
އައްޑޫ ލިންކް ރޯޑު މަރާމާތު ކުރުމަށް ވެސް މިލިއަނަކަށް ވުރެ ގިނަ ރުފިޔާ ސަރުކާރުން ބުނާ ގޮތުން ވަނީ ޚަރަދުކޮށްފައެވެ. އަދި ސަރުކާރުގެ "ރަށްވެހި ތަރައްޤީ" ފޮތުގައި ބުނެފައިވާ ގޮތުން އެމަގު މަރާމާތުކޮށް ނިމިއްޖެއެވެ.
ސަރުކާރުން ލިންކް ރޯޑު މަރާމާތުކޮށް ނިމުނު ކަމަށް ބުނާއިރު އަދިވެސް އެމަގުގެ އެކި ހިސާބުތަކުގައި ހުރީ ވަޅުގަނޑުތަކެވެ.
އައްޑޫ މަގު ހެދުމުގެ މަސައްކަތް 2016 ވަނަ އަހަރުން ފެށިގެން ސަރުކާރުން ކޮންމެ އަހަރެއްގެ ބަޖެޓެއްގައި ވެސް ހިމަނައެވެ. "ޚާއްސަ އިސްކަމެއް" ދީގެން އެމަސައްކަތް ކުރާ ކަމަށް ވެސް އެތައް ފަހަރަކު ވަނީ ބުނެފައެވެ. އެހެން ނަމަވެސް މަގު ހެދުމުގެ މަސައްކަތް ފެށޭ ގޮތެއް ނުވެއެވެ.
އައްޑޫގެ މަގު ހެދުމުގެ މަޝްރޫޢު ހުއްޓުމެއް ނެތި ކުރިއަށްދާ ކަމަށް ސަރުކާރަށް ތާއީދު ކުރާ ފަރާތްތަކުން ވިދާޅުވެއެވެ. އެހެން ނަމަވެސް އެ މަޝްރޫޢު އައްޑޫ ރައްޔިތުންގެ ލޮލަކަށް ނުފެނެއެވެ. އައްޑޫ މަގު ހެދުމުގެ ވާހަކަ ކިރިޔާ ވެސް ފެންނަނީ ހައުސިން މިނިސްޓަރު ޑރ. މުހައްމަދު މުއިއްޒުގެ ޓްވިޓާގައެވެ.
ރައީސް ޔާމީންގެ ދައުރު ނިމެން މަދު ދުވަސްކޮޅަކަށް ވެފައިވާއިރު މަގު ހެދުމުގެ މަސައްކަތް ކުރިއަށް ނުދަނީ ކީއްވެ ހެއްޔެވެ؟ އެކަން ކުރަން ސަރުކާރުން ބޭނުން ނުވަނީ ހެއްޔެވެ؟
'އައްޑޫލައިވް' އާއި ވާހަކަ ދައްކަމުން ހައުސިން މިނިސްޓްރީގެ އައްޑޫ ޑިޕާޓްމަންޓްގެ އޮފިޝަލަކު ވިދާޅުވި ގޮތުގައި އައްޑޫގެ މަގުތަކުގެ މަސައްކަތް "ވަރަށް އަވަހަށް ފަށާނެ" ކަމަށެވެ.
"އަޅުގަނޑުމެން މިހާރު މަޑުކޮށްގެން މިތިބީ ނަރުދަމާ ނިމެންދެން. ނިމުމާއި އެކު ފަށާނަން. އެކަމަށް ޕްލޭންތައް ސަރުކާރުން ވަނީ ނިންމާފައި" އޮފިޝަލް ބުންޏެވެ.
ސަރުކާރުން އެކަމަށް ޕްލޭންތަކެއް ހަދާފައިވާ ނަމަ އެއީ އުފާވެރި ޚަބަރެކެވެ. އެހެން ނަމަވެސް އެކަން ރައްޔިތުންނާއި ހިއްސާ ކުރަން ފަސްޖެހިގެން ނުވާނެއެވެ.
އައްޑޫގެ މަގުތައް ވަރަށް އަވަހަށް ފަށާނެ ކަމަށް ހައުސިން މިނިސްޓްރީގެ އޮފިޝަލުން ވިދާޅުވި ނަމަވެސް އައްޑޫގައި ހުރި ތާރު އަޅާ މެޝިނާއި މަގު ހަދަން ބޭނުންކުރާ ގިނަ ވެހިކަލްތައް ވަނީ އައްޑޫން ބޭރަށް ގެންގޮސްފައެވެ.
އަދި އައްޑޫގެ މަގު ހެދުމުގެ މަސައްކަތުގައި ހަރަކާތްތެރިވާ ބައެއް މުވައްޒަފުން ވެސް މި ދުވަސްކޮޅު ތިބީ މާލެ އާއި ބައެއް އެހެން ރަށްތަކުގެ މަގު ހެދުމުގެ މަސައްކަތަށް ގެންގޮސްފައެވެ.
މި ހުރިހާ ކަމެއް ކުރީ، މަގުތައް ރަނގަޅު ފެންވަރަކަށް ހެދުމުގެ މަޝްރޫޢު ހުއްޓާލާފައިވާތީ ހެއްޔެވެ؟ ނުވަތަ އައްޑޫއަށް ވުރެ މާލޭގެ ތަރައްޤީ ސަރުކާރަށް މުހިއްމު ވުމުން ހެއްޔެވެ؟