ފާއިތުވި ބުދަ ދުވަހު ނޫސްވެރިންނާއި ބައްދަލުކުރައްވަމުން އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް(އިބޫ) ވިދާޅުވި ގޮތުގައި، އެމަނިކުފާނުގެ ވެރިކަމުގެ ފުރަތަމަ ދުވަހު ލާމަރުކަޒީ ނިޒާމުން ކައުންސިލްތަކަށް ލިބެންޖެހޭ ބާރުވެރިކަން ހޯދައި ދެއްވާނެ ކަމަށެވެ.
އިބޫގެ މިވާހަކަތަކަށް 1 ދުވަސް ފަހުން، ރައީސް އަބްދުﷲ ޔާމީން ވަނީ މާލެ ސަރަހައްދަށް އިތުރު 3 ލައްކައަށް ވުރެ ގިނަ މީހުން ޖަމާކުރެއްވުމުގެ ވިސްނުންފުޅު ހާމަކުރައްވާފައެވެ. އެކަން ކުރައްވާނީ މާލޭގެ އަވަށެއް ކަމުގައި ބަލާ ވިލިމާލެ އާއި މާލެ ބްރިޖަކުން ގުޅާލުމަށް ފަހުގައި ކަމަށް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީންގެ ފަރާތްޕުޅުން މިހާތަނަށް މެނިފެސްޓޯއެއް އިއުލާން ކުރައްވާފައި ނުވަނީސް، ރޭ ދެއްކެވި ވާހަކަފުޅަކީ ރިޔާސީ އިންތިޚާބާއި ދިމާކޮށް ހާމަކުރެއްވި ފުރަތަމަ ސިޔާސަތެވެ. ރައީސް ޔާމީން ރޭ ވިދާޅުވި ގޮތުގައި ވިލިމާލޭގައި 3 ލައްކައަށް ވުރެ ގިނަ މީހުން އާބާދު ކުރުމަށް ފަށާ މަޝްރޫޢަކީ "ޓޯޓަލް ސޮލިއުޝަން" އެކެވެ.
ރައީސް ޔާމީންގެ މި ވާހަކަފުޅު އިދިކޮޅު ފަރާތްތަކުން ސިފަކުރީ މާލޭގެ ރައްޔިތުން "ރުއްސަން" ދެއްކެވި ވާހަކަތަކެއްގެ ގޮތުގައެވެ. އަދި އެއީ އަތޮޅު ތެރޭގެ ރަށްތަކުގައި ތިބި ރައްޔިތުން "ބިކަކޮށްލުން" ކަމުގައި ވެސް އެއް ބަޔަކު ވަނީ ސިފަކޮށްފައެވެ.
ރައީސް ޔާމީންގެ ވެރިކަމުގައި ލާމަރުކަޒީ ޤާނޫނުގެ ދަށުން ކައުންސިލްތަކަށް ލިބިފައިވާ ބާރުތައް ވަނީ ހަނިކޮށްފައެވެ. އެގޮތުން ސިޓީ ކައުންސިލްތަކުގެ ބާރުތައް ހަނިކޮށް މައި ސަރުކާރަށް އެ ބާރުތައް ވަނީ ނަގާފައެވެ.
މީގެ އިތުރުން ވެސް ކައުންސިލްތައް ސަސްޕެންޑް ކުރުން ފަދަ ކަންތައް ދޭތެރެއަކުން ކުރެއެވެ.
ނަމަވެސް އިދިކޮޅު ކޯލިޝަނުގައި ހިމެނޭ ހުރިހާ ޕާޓީތަކެއްގެ ވިސްނުން ހުރީ، ލާމަރުކަޒީ ކުރުމާއި ދިމާލަށެވެ. އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބޫ ނިސްބަތްވެވަޑައިގަންނަވާ އެމްޑީޕީން އެކުލަވާލި މެނިފެސްޓޯގައި ލާމަރުކަޒީ ކުރުމަށް އިސްކަންދޭނެ ކަން ހާމަކޮށްފައިވެއެވެ.
އަދި އަދާލަތު ޕާޓީގެ ފަރާތުން ކޯލިޝަނުގެ މެނިފެސްޓޯގައި ހިމަނަން ޖެހޭ ކަމަށް ފެންނަ މުހިއްމު ކަންތައް ހާމަކުރި އިރު އޭގެ ތެރޭގައި ވެސް ލާމަރުކަޒު ކުރުން ހިމެނެއެވެ.
ސެޕްޓެމްބަރު 23ގައި އޮންނަ ރިޔާސީ އިންތިޚާބުގައި ރާއްޖޭގެ ރައްޔިތުން ވޯޓުލާ ގޮތަކުން އެ ރައްޔިތުން ބޭނުންވަނީ ލާމަރުކަޒީ އުސޫލުން އަތޮޅުތެރޭގެ ރަށްތައް ތަރައްޤީކުރަން ތޯ ނުވަތަ މާލެ ސަރަހައްދަށް ހިޖުރަ ކުރުންތޯ ހާމަވެގެން ދާނެއެވެ.
ފަހަރެއްގައި ރިޔާސީ އިންތިޚާބާއި ދެމެދު އޮތް މަދު ދުވަސްކޮޅުގެ ތެރޭގައި ރައީސް ޔާމީން އެމަނިކުފާނުގެ މެނިފެސްޓޯ އިއުލާން ކުރައްވާއިރު، އަތޮޅުތެރޭގެ ރައްޔިތުންގެ ހިތް އުފާވާ ކަހަލަ ކަންތަކެއް ވެސް ފެނިގެން ހިނގައިދާނެއެވެ.
އެހެން ނަމަވެސް މިހާތަނަށް ފެންނަން ހުރި ކަންތަކަށް ބަލާއިރު އިބޫގެ ވިސްނުން ހުރީ ލާމަރުކަޒީ އުސޫލުން އަތޮޅު ތެރޭގެ ރަށްތައް ތަރައްޤީ ކުރުމަށެވެ. ރައީސް ޔާމީންގެ ވާހަކަފުޅުތަކުން ހާމަވަނީ މާލެ ސަރަހައްދަށް ރައްޔިތުން ހިޖުރަކުރަން އެދިވަޑައިގަންނަވާ ކަމެވެ.