ސްޕެއިނުގެ ރެއާލް މެޑްރިޑް ދޫކޮށް ދާދިފަހުން އިޓަލީގެ ޔުވެންޓަސް އަށް ބަދަލުވި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ މިހާރުގެ ޓީމުގެ ޖާޒީގައި އޭނާ ކުޅޭ ފުރަތަމަ މެޗުގައި ނިކުންނާނީ އޯގަސްޓް މަހުގެ 19 ވަނަ ދުވަހު އިޓާލިއަން ލީގުގައި ރަށުން ބޭރުގައި ކިއޭވޯ ވެރޯނާއާ ދެކޮޅަށެވެ.
ޔުވެންޓަސްގެ ދަނޑުގައި ރޮނާލްޑޯ ކުޅޭ ފުރަތަމަ މެޗުގައި ނިކުންނާނީ 26 އޯގަސްޓް ވާ އާދީއްތަ ދުވަހު އިޓާލިއަން ލީގުގައި ލާޒިއޯ އާ ދެކޮޅަށެވެ.
ދުނިޔޭގެ މޮޅު ކުޅުންތެރިޔާ އަށް ދޭ ބެލެންޑޯ އެވޯޑް ފަސް ފަހަރު ހޯދާފައިވާ ރޮނާލްޑޯ ވަނީ މިހާތަނަށް ކްލަބު އަދި ޤައުމީޓީމަށް 600 އަށް ވުރެ ގިނަ ގޯލް ކާމިޔާބުކޮށް ކްލަބު ފުޓްބޯޅައިގެ އެންމެ ޝަރަފުވެރި މުބާރާތް ކަމަށްވާ ޗެމްޕިއަންސް ލީގު ތަށި ވެސް ފަސް ފަހަރު ހޯދާފައެވެ. މީގެއިތުރުން، އޭނާ ވަނީ ޕޯޗުގަލް އާ އެކު 2016 ވަނަ އަހަރުގެ ޔޫރަޕިއަން ޗެމްޕިއަންޝިޕްގެ ތަށި ވެސް ކާމިޔާބުކޮށްފައެވެ.
ފާއިތުވި ސީޒަނުގައި ޔޫއެފާ ޗެމްޕިއަންސް ލީގު ތަށި ސްޕެއިންގެ ރެއާލް މެޑްރިޑާއި އެކު އުފުލާލިއިރު އޭނާ ވަނީ އެމުބާރާތުގެ ކުއާޓާ ފައިނަލްގައި ޔުވެންޓަސް ކޮޅަށް ރީތި ގޯލެއް ވައްދާލައި އެޓީމު މުބާރާތުންވެސް ކަޓުވާލައިފައެވެ. އެމުބާރާތުގައި އޭނާ ވަނީ 15 ގޯލް ކާމިޔާބުކޮށް ޓޮޕް ސްކޯރަރގެ މަޤާމްވެސް ހޯދާފައެވެ. އޭގެ ކުރީ ސީޒަނުގައި ޗެމްޕިއަންސް ލީގުގެ ފައިނަލްގައި ހިތްދަތިގޮތަކަށް ޔުވެންޓަސް ބަލިކުރިއިރުވެސް ރޮނާލްޑޯ ވަނީ އެމެޗުގައި ދެލަނޑުޖަހާފައެވެ.
ނިމިދިޔަ ވޯލްޑްކަޕްގެ ދެވަނަ ބުރަށް ޕޯޗުގަލް ދަތުރުކުރިއިރު އޭނާ ވަނީ އެމުބާރާތުގައި ހަތަރު ގޯލް ކާމިޔާބުކޮށްފައެވެ. މީގެއިތުރުން، އޭނާ ވަނީ އެމުބާރާތުގެ ގްރޫޕް ސްޓޭޖުގައި ސްޕެއިނާއި ދެކޮޅަށް ކުޅުނު މެޗުގައި ހެޓްރިކް ހަދާފައެވެ.
ރެއާލް ދޫކޮށް ޔުވެންޓަސް އަށް ބަދަލުވުމުން ގިނަ ބައެއްގެ ތައުރީފް ދަނީ ރޮނާލްޑޯ އަށް ލިބެމުންނެވެ. މިގޮތުން، އިޓަލީ އަދި ރޯމާގެ ކުރީގެ ކުޅުންތެރިޔާ ޓޮޓީ ބުނެފައިވަނީ ރޮނާލްޑޯ އައުމުން ލީގުގެ ފެންވަރު މިހާރަށްވުރެ ރަނގަޅުވާނެކަމަށެވެ. އިޓަލީގެ ކޯޗް ރޮބާޓޯ މަންޗިނީ ބުނިގޮތުގައި ރޮނާލްޑޯގެ ސަބަބުން ޔުވެންޓަސްގެ އިތުރުން އިޓަލީގެ ފުޓްބޯޅައަށް ވެސް ފައިދާތައް ކުރާނެކަމަށެވެ.
މީގެއިތުރުން، ޔުވެންޓަސްގެ ކޯޗް މަސިމިލިއާނޯ އަލެގްރީ ބުނެފައިވަނީ ރޮނާލްޑޯގެ ފަރާތުން ގިނަ ގޯލްތަކެއް ފެނިގެންދާނެކަމުގެ ޔަޤީންކަން އެބައޮތްކަމަށެވެ. އެހެންނަމަވެސް، ރޮނާލްޑޯ ކުޅޭނެ ސީދާ މަޤާމެއް ބުނަން އޭނާވަނީ ދެކޮޅު ހަދާފައެވެ.