ސިވިލް ސާވިސް މުވައްޒަފުންގެ އިތުރު ގަޑީގެ ފައިސާ ލިމިޓް ކުރުން ނިމުމަކަށް ގެންނަވާނެ ކަމަށް އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިރޭ ރާއްޖެ ޓީވީ އިން ގެނެސްދިން "އިބޫ" ޕްރޮގްރާމްގައި ވާހަކަ ދައްކަވަމުންނެވެ.
ސިވިލް ސަރވިސްގައި މިހާރު އަމަލުކުރަމުންދާ އުސޫލުތަކަށް ބަލާއިރު އިތުރު ގަޑީގައި ކިތަންމެ ގިނައިރު މަސައްކަތް ކުރަން ޖެހުނު ނަަމަވެސް މަހެއްގެ މައްޗަށް އޯޓީގެ ގޮތުގައި ލިބޭނީ ވަކި މިންވަރެކެވެ. އެ ކަންބޮޑުވުމަކީ ޚާއްސަ ގޮތެއްގައި ސިވިލް ސާވިސްގައި ހިމެނޭ ޓީޗަރުންގެ ބޮޑު ޝަކުވާއެކެވެ.
ސިވިލް ސާވިސް މުވައްޒަފުންނަށް ދިމާވެފައިވާ މި ގޮންޖެހުމާއި ބެހޭގޮތުން ވާހަކަ ދައްކަވަމުން އިބޫ ވިދާޅުވީ، ވަޒީފާ އަދާކުރާ ފަރާތްތަކަށް ދެވޭ އުޖޫރަ މުރާޖަޢާ ކުރަން ޖެހޭ ކަމަށެވެ.
އެގޮތުން މިހާރު މިއޮންނަ ގޮތުން ކިތަންމެ ގިނައިރަކު މަސައްކަތް ކުރި ނަމަވެސް އިތުރު ގަޑީގެ ފައިސާ ލިބޭ މިންވަރު އޮންނަނީ ވަރަށް ބޮޑަށް ލިމިޓް ކުރެވިފައިކަން އިބޫ ފާހަގަކުރެއްވިއެވެ.
އިބޫ ވިދާޅުވި ގޮތުގައި ގުޅިފައިވާ ސިޔާސީ ޕާޓީތަކުގެ ވެރިކަމެއްގައި އޯވަޓައިމް ފައިސާ ލިމިޓް ކުރުމަށް ނިމުމެއް ގެންނަވާނެ ކަމަށެވެ.
"މިހާރު މިއޮންނަ ގޮތުން އޯވަޓައިމް މިއޮންނަނީ ލިމިޓް ކުރެވިފައި. ކިތަންމެ ގިނައިރަކު މަސައްކަތް ކުރި ނަމަވެސް އޯވަޓައިމް މިދެވެނީ ވަކި ވަރަކަށް. އެކަން އަޅުގަނޑުމެން އިރާދަކުރެއްވިއްޔާ ނައްތާލާނަން" އިބޫ ވިދާޅުވިއެވެ.
މީގެ އިތުރުން އިބޫ ވިދާޅުވި ގޮތުގައި ސިވިލް ސާރވިސް މުވައްޒަފުންނަށް ކޮށްދެވޭނެ ކަންތައް ބަލަމުން ގެންދާ ކަމަށާއި އެކަން ކުރިއަށް އޮތް ދުވަސްތަކުގައި ހާމަކުރައްވާނެ ކަމަށެވެ.