ކޮލަމްބިއާގެ ގޭންގަކުން މަސްތުވާތަކެތި އަތުލަތި ގަތުމަށް އެގައުމުގެ ފުލުހުން ބޭނުންކުރާ ކުއްތާއެއްގެ ބޮލަށް 70 ހާސް ޑޮލަރު ހުށަހަޅައިފިއެވެ.
ސޮމްބްރާގެ ނަން ދީފައިވާ ކުއްތާ ބޭނުންކޮށްގެން ކޮލަމްބިއާގެ ފުލުހުން ހިންގި އޮޕަރޭޝަންތަކުގައި މިހާތަނަށް ވަނީ 9 ޓަނުގެ ކޮކެއިން އަތުލައިގަނެފައެވެ. އަދި ހޯދާފައިވާ މަސްތުވާތަކެއްޗާއި ގުޅުން ހުރި 245 މީހަކު ވެސް ކޮލަމްބިއާ ފުލުހުން ވަނީ ހައްޔަރުކޮށްފައެވެ.
ސޮމްބްރާ މަރާލާ ފަރާތަކަށް ހަތްދިހަ ހާސް އެމެރިކާ ޑޮލަރު ދޭނެ ކަމަށް ބުނެފައިވަނީ ކޮލަމްބިއާގެ އެންމެ ނުރައްކާތެރި ގޭންގް ކަމުގައިވާ، އުރަބެއްނޯސް އިންނެވެ.
ކޮލަމްބިއާގައި ކުރިއަށް ދާ މަސްތުވާތަކެތި އަތުލައިގަތުމުގެ އޮޕަރޭޝަންތަކުގައި ސޮމްބްރާގެ ބޭނުން ފުލުުހުން ވަރަށް ބޮޑަށް ކުރެއެވެ. އެހެންވެ ކޮލަމްބިޔާގެ އާއްމުންގެ ތެރޭގައި ވެސް އެ ކުއްތާގެ މަގުބޫލުކަން ވަނީ ވަރަށް ބޮޑަށް އިތުރުވެފައެވެ.
ސޮމްބްރާ މަރާލާ ފަރާތަކަށް ބޮޑު އިނާމެއް ހުށަހަޅާފައިވާއިރު ކޮލަމްބިޔާގެ ފުލުހުން ވަނީ ސޮމްބްރާގެ ސަލާމަތާއި ރައްކާތެރިކަމަށް އިތުރު ފިޔަވަޅުތައް އަޅަން ފަށާފައެވެ.