އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އަށް ތާއިދުކުރުމަށް ކުރީގެ ރައީސް މައުމޫން އަބްދުލް ޤައްޔޫމް އެމަނިކުފާނުގެ ސަޕޯޓަރުންގެ ކިބައިން އެދިވަޑައިގެންފިއެވެ.
ރައީސް މައުމޫން އެމަނިކުފާނުގެ ސަޕޯޓަރުންގެ ކިބައިން އިބޫއަށް ވޯޓު ދިނުމަށް އެދިވަޑައިގަންނަވާކަން ހާމަކުރެއްވީ ރައީސް މައުމޫންގެ ސަރުކާރުގައި މިނިސްޓަރު ކަން ކުރެއްވި އަބްދުﷲ ކަމާލުއްދީން އެވެ.
ޖަލުގައި ބަންދުކޮށްފައިވާ ރައީސް މައުމޫންގެ ފަރާތްޕުޅުން ރިޔާސީ އިންތިޚާބުގެ ކެމްޕެއިން އަށް ރަށްރަށަށް ވަޑައިގަންނަވާނީ ކަމާލުއްދީން ކަމަށް މިހާރު ވަނީ ހަމަޖައްސާފައެވެ.
މިރޭ ބ. ގޮއިދޫގައި އިދިކޮޅު ފަރާތްތަކުން ބާއްވަމުން ގެންދާ ޖަލްސާގައި ވާހަކަ ދައްކަވަމުން ކަމާލުއްދީން ވިދާޅުވީ، ރައީސް މައުމޫނު އެދިވަޑައިގަންނަވަނީ އެމަނިކުފާނަށް ތާއިދުކުރާ ފަރާތްތަކުން އިބްރާހިމް މުހައްމަދު ސޯލިހަށް ތާއިދު ކޮށްދެއްވުމަށް ކަމަށެވެ.
ކަމާލުއްދީން ވިދާޅުވި ގޮތުގައި ރައީސް މައުމޫނަށް ތާއިދުކުރާ ފަރާތްތަކުން ތިބީ ރިޔާސީ އިންތިޚާބު ކޯލިޝަނަށް ކާމިޔާބު ކޮށްދިނުމަށް ކުރެވެން ހުރި ހުރިހާ މަސައްކަތެއް ކޮށްދިނުމަށް ކަމަށެވެ.