މީގެ 5 އަހަރެއްހާ ދުވަސް ކުރިއެވެ. 2013 ވަނަ އަހަރުގެ އޯގަސްޓް 30 ވަނަ ދުވަހު އައްޑޫގައި ބޭއްވި ޖަލްސާއެއްގައި މިހާރުގެ ރައީސް އަބްދުﷲ ޔާމީން ވިދާޅުވި ގޮތުގައި، "އައްޑޫގެ ތަރައްގީ އަށް އެންމެ ވަރުގަދަ އަށް މަސައްކަތް ކުރާނެ މީހަކީ އަޅުގަނޑު." ކަމަށެވެ.
ހިތަދޫ ބޮޑުމަގުގައި (ކުރީގެ ގްލޯބަލް ލިންކްސް ފިހާރަ ކައިރީގައި)ހުޅުވި "ފަހި 13" އަންހެނުންގެ ޖަގަހައިގައި ވާހަކަ ދައްކަވަމުން، ޔާމީން އޭރު ވިދާޅުވީ، ، "އިގުތިސާދީ މެނިފެސްޓޯ އިއުލާނު ވެގެންދާ އިރު އަޅުގަނޑުމެންގެ މެނިފެސްޓޯއާ ކައިރި އަށް އާދެވޭނެ ޕާޓީއެއް ނޫޅޭނެ" ކަމަށެވެ.
ރިޔާސީ އިންތިޚާބަށް ކެމްޕެއިން ކުރައްވަމުން ރައީސް ޔާމީން ވިދާޅުވި ގޮތުގައި، މައުމޫނުގެ ވެރިކަމުގައި އުފެއްދެވި އައްޑޫ ޑިވެލޮޕްމަންޓް އޮތޯރިޓީ (އޭޑީއޭ)ގައި ހުންނަވައިގެން ވަރަށް ގިނަ "ކަންކަން އައްޑޫއަށް ކޮށްދެއްވި" ކަމަށެވެ.
އެކަންތަކުގެ ގޮތުގައި ޔާމީން ފާހަގަކުރެއްވީ، އައްޑޫގައި ތިބި ސަރުކާރުގެ މުވައްޒަފުންގެ އަދަދު 17 އިން 400 އަށް އިތުރު ކުރެއްވުމެވެ.
މިހާރު ރައީސް ޔާމީން ގޮވާލައްވަމުން އެގެންދަވަނީ މާލެ ސަރަހައްދަށް އައްޑޫ ރައްޔިތުން ވެސް ހިޖުރަ ކުރެއްވުމަށެވެ. އައްޑޫ ތަރައްޤީ ކުރާ ގޮތަކީ އެއީ ކަމަށް ވެސް ވެދާނެއެވެ.
އެއީ ވެރިކަމަށް ވަޑައިގަތުމަށް މީޣެ 5 އަހަރު ކުރިން ކެމްޕެއިން ކުރައްވަމުން ރައީސް އަބްދުﷲ ޔާމީން ދެއްކެވި ވާހަކަފުޅެވެ. މިއަދު އެމަނިކުފާނުގެ ވެރިކަމުގެ 5 އަހަރުގެ ދައުރު ނިމިގެންދާއިރު، އެ ވިދާޅުވި ތަރައްޤީ އައްޑޫއަށް ގެނެސް ދެއްވައިފި ހެއްޔެވެ؟
5 އަހަރުކުރިން ޔާމީން ވިދާޅުވި އިޤްތިސާދީ މެނިފެސްޓޯ އެއްގެ ދަށުން އައްޑޫގައި އިޤްތިސާދީ ބޮޑެތި މަސައްކަތްތައް ފެށުނު ހެއްޔެވެ؟
މި ސުވާލުތަކުގެ ޖަވާބަކީ ކޮބައިކަން ކޮންމެ ކުލައަކަށް ތާއީދު ކުރި ނަމަވެސް، އެއީ އައްޑޫ ރައްޔިތެއް ނަމަ އޮޅިފައެއް ނުވާނެއެވެ. އެހެނަސް ވަޒީފާއާއި ތިމާއަށް ލިބޭ މަންފާއަކަށް ޓަކައި ބައެއް މީހުން ދައްކަން ބޭނުން ނުވަނީއެވެ.
5 އަހަރު ކުރިން "އައްޑޫ ތަރައްޤީ ކުރާނީ އަޅުގަނޑު" ކަމަށް ވިދާޅުވުމުން އައްޑޫ ރައްޔިތުންގެ ތެރެއިން ބަޔަކު ރައީސް ޔާމީނަށް ވޯޓު ދިނެވެ. ރައީސް ޔާމީނަށް 2013ގެ އިންތިޙާބު ކާމިޔާބު ކުރުމަށް މުހިއްމުވި ހައެއްކަ ހާސް ވޯޓުގައި އެ ރައްޔިތުންގެ ހިއްސާވެސް ކުޑައެއް ނޫނެވެ.
ސުވާލަކީ، "އައްޑޫ ތަރައްޤީ ކުރާނީ އަޅުގަނޑު" ކަމަށް ވިދާޅުވެ 5 އަހަރުގެ ދައުރުގައި ޔާމީންގެ "ޕާފޯމެންސް" އަށް ބަލާފައި އައްޑޫން ޔާމީނަށް ވޯޓު ދިން މީހުން މިފަހަރު ހަދާނީ ކިހިނެއް ހެއްޔެވެ؟