މިވަގުތަކީ ޕީޕީއެމް އަށާއި ރައީސް އަބްދުﷲ ޔާމީން އަށް ތާއީދު ކުރާ ފަރާތްތަކުގެ ސަފުތައް ވަރުގަދަ ކުރަންވީ ވަގުތު ކަމުގައި ރައީސް ޔާމީންގެ ރަނިންމޭޓް ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް މިހެން ވިދާޅުވީ، މިރޭ ދަރުބާރުގޭގައި ރައީސް ޔާމީން އާއި ޝަހީމް އަށް ރަސްމީކޮށް ރިޔާސީ އިންތިޚާބުގެ ޓިކެޓްތައް ހަވާލުކުރަން ބޭއްވި ޖަލްސާގައި ވާހަކަ ދައްކަވަމުންނެވެ.
އެ ޖަލްސާގައި ވާހަކަ ދައްކަވަމުން ޝަހީމް ވިދާޅުވި ގޮތުގައި، "މިއީ އެކަކުގެ އަތުގައި އަނެކަކު ހިފަންވީ ވަގުތު." ކަމަށެވެ.
ރައީސް ޔާމީނަށް ވަރަށް ބޮޑަށް ތައުރީފް ކުރައްވައި ވާހަކަ ދައްކަވަމުން ޝަހީމް ވިދާޅުވި ގޮތުގައި، މިވަގުތު ޕީޕީއެމްގައި ހުރީ ވަރުގަދަ "ކައްޕިތާނެއް" ކަމަށެވެ.
މިރޭގެ ރަސްމިއްޔާތުގައި ޝަހީމް ވަނީ ޕީޕީއެމް އަށް ސޮއިކުރައްވާފައެވެ.
ޕީޕީޢެމް އަށް ސޮއިކުރެއްވުމަށް ފަހު ޝަހީމް ވިދާޅުވި ގޮތުގައި އެ ޕާޓީއަށް ސޮއިކުރެއްވީ ހިތުގެ އަޑިން ޕީޕީއެމް ފިކުރު ޤަބޫލުކުރައްވާތީ ކަމަށެވެ. އަދި ޕީޕީޢެމްގައި ރައީސް ޔާމީން ހުންނެވިހައި ދުވަހަކު އެޕާޓީގައި ހުންނަވާނެ ކަމަށް ވެސް ޝަހީމް ވަނީ ވިދާޅުވެފައެވެ.