ގާނޫނުލްއުގޫބާތުގައި ރިޝްވަތުގެ ކުށް ކަނޑައަޅާފައިވާ މާއްދާ އުވާލެވޭ ގޮތަށް ރައީސް އަބްދުﷲ ޔާމީންގެ ސަރުކާރުން ރައްޔިތުންގެ މަޖިލިހަށް ބިލެއް ހުށަހަޅައިފި އެވެ.
މި އިސްލާހު މަޖިލީހަށް ހުށަހަޅާފައި ވަނީ ފޭދޫ ދާއިރާގެ ޕީޕީއެމް މެމްބަރު އިބްރާހިމް ދީދީ (އައިބީ) އެވެ.
މެންބަރު އައިބީ، ގާނޫނުލްއުގޫބާތުގެ 510 ވަނަ މާއްދާއަށް ހުށައެޅުއްވި އިސްލާހުގައި އެ މާއްދާގައި މިހާރު ބަޔާންކޮށްފައިވާ ރިޝްވަތުގެ ވާހަކަ އާއި އެއްވެސް ކަހަލަ ގުޅުމެއް ނެތް ބައިތަކެއް ހިމެނެއެވެ. މިއީ އޮޅިވަޑައިގެން ހުށަހެޅުއްވި ގޮތް ކަމެއް ނުވަތަ ސާފެއް ނުވެއެވެ.
އައިބީ ހުށަހެޅުއްވި އިސްލާހު މަޖިލީހަށް ބަލައިގަނެފައިވާއިރު މިހާރު އެ އިސްލާހު އޮތީ ކޮމިޓީ މަރުހަލާގައެވެ. ޤާނޫނީ ވަކީލުން ބުނާ ގޮތުގައި އައިބީ ހުށަހެޅުއްވި އިސްލާހު ފާސްވެއްޖެ ނަމަ ރާއްޖޭގެ ގާނޫނުލް އުގޫބާތުގައި، ރިޝްވަތު ހިފުމާއި ދިނުން ކުށަކަށް ވުން ހުއްޓިދާނެއެވެ.