އެއްވެސް ޝަރުތަކާއި ނުލައި އިރާންގެ ރައީސް ރައީސް ހަސަން ރޫހާނީ އާއި ބައްދަލުކުރައްވަން ތައްޔާރަށް ހުންނެވި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
އިޓަލީގެ ބޮޑުވަޒީރާއި އެކު ވައިޓް ހައުސްގައި ބޭއްވި ބައްދަލުވުމަކަށް ފަހު ނޫސްވެރިންނާއި ވާހަކަ ދައްކަވަމުން ޓްރަމްޕް ވިދާޅުވީ، އެއްވެސް ޝަރުތަކާއި ނުލައި ކޮންމެ ތަނެއްގައި، އަދި ކޮންމެ ވަގުތެއްގައި ވެސް އިރާނުން ބޭނުންވާ ނަމަ މަޝްވަރާ ކުރައްވަން ތައްޔާރަށް ހުންނެވި ކަމަށެވެ.
ޓްރަމްޕްގެ ވެރިކަމުގައި އިރާނާއި އެކު އޮންނަ ގުޅުން ގޯސްވެ އެގައުމާއި ދެކޮޅަށް ހަނގުރާމަ އިއުލާން ކުރައްވާނެ ފަދަ މޭރުމަކުން ވެސް ޓްރަމްޕް ވާހަކަ ދައްކަވާފައިވެއެވެ. އެހެން ނަމަވެސް ފަހުން ޓްރަމްޕް ވަނީ އޭނާގެ ވާހަކަތަކުގެ ރާގު ބަދަލުކުރައްވާފައެވެ.
ޓްރަމްޕް އިރާނާއި އެކު ބައްދަލުކުރައްވަން ތައްޔާރަށް ހުންނެވި ކަމަށް ވިދާޅުވި އިރު ފާއިތުވި ހަފްތާގައި ވެސް އިރާނުގެ ރައީސަށް އިންޒާރުތަކެއް ދެއްވާފައިވެއެވެ.
ޓްރަމްގެ އިންޒާރުތަކާއި ގުޅިގެން އީރާނުގެ ރައީސް ހަސަން ރޫހާނީ ވިދާޅުވެފައި ވަނީ އެގައުމާއި ދެކޮޅަށް އެމެރިކާއިން ހަނގުރާމަ ފަށައިފި ނަމަ އެ ހަނގުރާމަ ވާނީ ހަނގުރާމަތަކުގެ "މަންމަ ހަނގުރާމަ" އަށް ކަމަށެވެ. މީގެ އިތުރުން އިރާންގެ ސްޕެޝަލް ފޯސަސްގެ ކޮމާންޑަރު މޭޖާ ޖެނެރަލް ގައްސާމް ސުލައިމާނީ ވަނީ ޓްރަމްޕަށް ކެރިވަޑައިގަންނަވަންޏާ ހަނގުރާމަ ފައްޓަވަންވީ ކަމަށާއި އީރާނުން އެ ހަނގުރާމަ ނިންމާނީ އެމެރިކާގެ ބާރުގައިވާ ހުރިހާ ތަނެއް ނެތިކޮށްލާފައި ކަމަށް ވިދާޅުވެފައެވެ.