2013 ވަނަ އަހަރުގެ ރިޔާސީ އިންތިޚާބާއި ދިމާކޮށް އައްޑޫ ސިޓީއަށް ވަޑައިގެން ކެމްޕެއިން ކުރައްވަމުން މިހާރުގެ ރައީސް އަބްދުﷲ ޔާމީން އައްޑޫގައި އައިޓީ ޕާކެއް ޤާއިމްކޮށްދެއްވާނެ ކަމަށް ވިދާޅުވިއެވެ. އެހެން ނަމަވެސް އޭގެ ފަހުން ފާއިތުވި 1730 ދުވަހުގެ ތެރޭގައި ރައީސް ޔާމީން އެވާހަކައެއް ނުދައްކަވައެވެ.
ސަރުކާރުގެ ތަރައްޤީ އައްޑޫ ރައްޔިތުންނަށް ދައްކަން ވެސް އެތައް ހަރަކާތެއް ބާއްވައިފިއެވެ. އައްޑޫގައި ޕީޕީއެމް އަދި ސަރުކާރުގެ އިސްވެރިން ބައިވެރިވާ އެތައް ޖަލްސާއެއް ބާއްވައިފިއެވެ. އެހެނަސް އައިޓީ ޕާކުގެ ވާހަކައެއް އެއިން އެއްވެސް ފަހަރަކު އަޑެއް ނީވެއެވެ.
އައިޓީ ޕާކު މަޝްރޫޢު ވީތަނެއް، އަދި އެކަމާއި ބެހޭ މައުލޫމާތު އެނގޭ ހަމަ އެއްވެސް މީހަކު ނެތީއެވެ. ނުވިތާކަށް އެވާހަކަ ދައްކަން ބޭނުންވާ އެއްވެސް ސިޔާސީ މީހަކު ވެސް ނެތެވެ.
މިހާރު އުފެދޭ ސުވާލަކީ، އައްޑޫގައި އައިޓީ ޕާކެއް ގާއިމްކުރައްވާނެ ކަމުގެ ވައުދާއި އެކު ވެރިކަމަށް ވަޑައިގަތުމަށް ފަހު އެވައުދުގެ ވާހަކަ ނުދައްވައި ރައީސް ޔާމީން އެމަނިކުފާނުގެ ދައުރު ފުރިހަމަކުރައްވަފާނެ ހެއްޔެވެ؟
ރައީސް ޔާމީން އެމަނިކުފާނުގެ ދައުރު ނިމުމުގެ ކުރިން އައިޓީ ޕާކު، ޤާއިމްކުރައްވާނެ ކަމެއް ނުވަތަ ނޫންކަން ވިދާޅުވާ ނަމަ އެކަމަށް އޮތީ އެންމެ ސަތޭކައެއްހާ ދުވަހެވެ.
ރިޔާސީ އިންތިޚާބަށް ވަގުތު ކުޑަތަން ވަމުން އަންނަ އިރު ރައީސް ޔާމީން ވެސް ގެންދަވަނީ ފޯރީގައި ކެމްޕެއިން ކުރައްވަމުންނެވެ. އަދި އެމަނިކުފާނު ވެސް ކުރިއަށް އޮތް ތަނުގައި ކެމްޕެއިން އަށް އައްޑޫ އަށް ވަޑައިގަންނަވާނެ ކަމަށް ބެލެވެއެވެ. އައްޑޫއަށް ވަޑައިގެން ކެމްޕެއިން ކުރައްވާއިރު ފަހަރެއްގައި، އައިޓީ ޕާކުގެ ވައުދުގެ ވާހަކަ އެމަނިކުފާނު ވިދާޅުވެދާނެއެވެ.
އައްޑޫ ރައްޔިތުންނަށް އޮތީ ރިޔާސީ ކެމްޕެއިނަށް އެމަނިކުފާނު އައްޑޫއަށް ވަޑައިގަންނަވާ ދުވަހަކަށް އިންތިޒާރު ކުރުމެވެ. ނުވަތަ ކެމްޕެއިން އަށް ރައީސް ޔާމީން ވަޑައިގެންނެވުމުން "އައިޓީ ޕާކު ކޮބައިތޯ" ސުވާލު ކުރުމެވެ.