ފޮތް ކިޔާފައި ވަގު ދޮގު މަކަރު ހެދުމަކީ ވަރަށް ނުބައިކަމެއް ކަމަށް ޕީޕީއެމްގެ ޕީޖީ ގްރޫޕްގެ ލީޑަރު އަހްމަދް ނިހާން ހަސަން މަނިކު ވިދާޅުވެއްޖެއެވެ.
މިއަދު ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނިހާން ވިދާޅުވި ގޮތުގައި، ފޮތް ކިޔަވާ ވިދާޅުވެފައި ދޮގު ހައްދަވާ ބޭފުޅުންނަށް ކިޔާ އުޅެނީ "ފޮތްތެރި ކާފަރުން" ކަމަށާއި އެއީ ވަރަށް ނުބައި ކަމެއް ކަމަށެވެ.
ނިހާން ވަކި ބޭފުޅެއްގެ ނަން ވިދާޅުނުވި ނަމަވެސް، ފޮތް ކިޔުމާއި ބެހޭގޮތުން މިސާލު ޖައްސަވައި ފާޑުވިދާޅުވީ ބެލެވޭ ގޮތުގައި ކުރީގެ ޑެޕިއުޓީ ޕީޖީ އަދި މަޝްހޫރު ޤާނޫނީ ވަކީލު ހުސައިން ޝަމީމް އަށެވެ.
ޝަމީމް ގެންދަވަނީ، ޕީޕީއެމްގެ ފަރާތުން އަދި ސަރުކާރުން ޤާނޫނާއި ޚިލާފްކަންތައް ކުރާ ކޮންމެ ފަހަރަކު އެއީ ފޮތް ނުކިޔާތީ ނޭނގިގެން ކުރާ ކަންތަކަކެއް ކަމުގައި ވިދާޅުވަމުންނެވެ.
"ތިމަންނާ މެން ވަރަށް ގިނައިން ފޮތް ކިޔަވާ ކަމަށްް ބުނެ، ފޮތް ކިޔާފަ ވަގު ދޮގު މަކަރު ހެދުން. އަދި އެއީ މާ ނުބައި ކަމެއް. އެޔަށް ކިޔަނީ ފޮތްތެރި ކާފަރުންނޭ." ނިހާން ވިދާޅުވިއެވެ.
ފޮތްތެރި ކާފަރުންނަކީ ކޮބައިކަން ތަފްސީލް ކޮށްދެއްވަމުން ނިހާން ވިދާޅުވީ، ދިވެހި ބަހުގައި އޮންނަ ހަމައަށް ބަލާއިރު އެއީ، "ރަނގަޅަށް ކިޔަވައި އެނގި ތިބެ ދަނެ ތިބެގެން ކަނޑައެޅިގެން މީހުން މަޖޫސީ ކުރުމަށްޓަކައި، ޔަހޫދީ ކުރުމަށްޓަކައި، ނަސްރާނިއްޔަ ކުރުމަށްޓަކައި ދޮގު ހަދަމުންދާ މީހުން" ކަމަށެވެ.