އައްޑޫ ސިޓީ، މީދޫ އަށް ނިސްބަތްވާ ޚާއްސަ އެހީއަށް ބޭނުންވާ ޒުވާނެއް ކަމުގައިވާ، ޝިރުހާން ޒަމީލް ކ.އަތޮޅު ހުރާއަށް ރަޖިސްޓްރީކޮށްފައިވާ ކަން ހާމަވެއްޖެއެވެ.
މިކަން ޝިރުހާންގެ އާއިލާއަށް އެނގުނީ، އެ އާއިލާގެ މީހުން ވޯޓުލުމަށް ރަޖިސްޓްރީވެފައިވާ ފޮށިތައް ބެލުމަށް މެސެޖު ކުރުމުންނެވެ.
ޝިރުހާންގެ ބޭބެ އަބްދުﷲ ވަސީމް ބުނެފައިވާ ގޮތުގައި، އިލެކްޝަންސް ކޮމިޝަނުގެ އިތުރުން އެ ކޮމިޝަނަށް ވާގިވެރިވާ މީދޫ ބަޔަކު ވެގެން ވަނީ ޝިރުހާނުގެ ވޯޓާސް ރަޖިސްޓްރީ އެހެން ރަށަކަށް ބަދަލުކޮށްފައި ކަމަށެވެ.
މީދޫގައި އެމްޑީޕީގެ ހަރަކާތްތަކުގައި އިސްކޮށް އުޅޭ އަބްދުﷲ ވަސީމް ބުނެފައިވާ ގޮތުގައި ޝަރުހާން އަކީ ދުވަހަކު ވެސް ރަށުން ބޭރަށް ގޮސް އުޅުނު ޒުވާނެއް ނޫން ކަމަށާއި، އިލެކްޝަންސް އަށް ވާގިވެރިވެ "ވައްކަން ކުރަމުންދާ" ބަޔަކު ވަނީ ޝަރުހާންގެ ރަޖިސްޓްރީ އެހެން ރަށަކަށް ބަދަލުކޮށްފައި ކަމަށެވެ.
"އިލެކްޝަންސްގެ ރައީސް އަށް ވެދުން ސަލާމަށްފަހު" ވަސީމް އޭނާގެ ފޭސްބުކްގައި ލިޔުނު ޕޯސްޓެއްގައި ވަނީ ޝަރުހާންގެ ރަޖިސްޓްރީ މީދޫ އަށް ބަދަލުކޮށް ދިނުމަށް އެދިފައެވެ.