ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމާ ބެހޭ ގާނޫނުގައިވާ ގޮތުން، އާބާދީގެ ފުރަތަމަ 5،000 މީހަކަށް ނުވަތަ އެ އަދަދަށް އާބާދީ ހަމަނުވާ ނަމަ ދާއިރާއަކަށް 2 މެންބަރުން އިންތިހާބު ކުރަން ޖެހޭނެއެވެ. އަދި އާބާދީ 5،000 އަށް ވުރެ އިތުރުވާ ނަމަ، އިތުރުވާ ކޮންމެ 5،000 މީހަކަށް އިތުރު މެމްބަރަކު އިންތިޚާބުކުރަން ޖެހޭނެއެވެ.
ރައްޔިތުންގެ މަޖިލީހުގައި މިވަގުތު 85 މެންބަރުން ތިއްބެވި އިރު، އައްޑޫގެ ދާއިރާތައް ތަމްސީލު ކުރައްވާ 7 މެންބަރުން ތިއްބަވައެވެ. އެއީ ހިތަދޫ ތަމްސީލު ކުރައްވާ 3 މެންބަރުންނާއި މަރަދޫ، މީދޫ ދާއިރާ(މަރަދޫފޭދޫ އަދި މީދޫ)، ހުޅުދޫ އަދި ފޭދޫ ދާއިރާއެވެ.
އިލެކްޝަންސް ކޮމިޝަނުން އާއްމުކޮށްފައިވާ ހިސާބުތަކަށް ބަލާއިރު މެއި މަހުގެ ނިޔަލަށް އައްޑޫގެ އާބާދީ އަކީ 33694 އެވެ. މި އާބާދީ އައްޑޫގައި މިހާރު އޮންނަ 7 އިންތިޚާބީ ދާއިރާއަށް ބެހުމުން، އިންތިޚާބީ ދާއިރާއަކަށް ޖެހޭ ނިސްބަތަކީ 4813 މީހުންނެވެ.
އައްޑޫގެ އާބާދީ 2017ގެ ޑިސެމްބަރުގައި ހުރީ، 33598 ގައެވެ. ފާއިތުވި 6 މަސް ދުވަހުގެ ތެރޭގައި އައްޑޫގެ އާބާދީ އިތުރުވެފައި ވަނީ އެންމެ 96 މީހުންނެވެ.
އައްޑޫއަށް އިތުރު މަޖިލިސް ގޮނޑިއެއް ލިބޭނީ 2018ގެ ޑިސެމްބަރާއި ހަމައަށް އައްޑޫގެ 35000 އަށް ވުރެ އިތުރުވެގެންނެވެ. އެ އަދަދު ހަމަވުމަށް އައްޑޫގެ މިހާރުގެ އާބާދީއަށް 1306 މީހުން އިތުރުވެގެންނެވެ.
2017ގެ ޑިސެމްބަރުން ފެށިގެން 2018ގެ މެއި މަހުގެ ނިޔަލަށް އައްޑޫގެ އާބާދީ އިތުރުވަމުން އަންނަ ރޭޓަށް ބަލާއިރު މަޖިލިސް އިންތިހާބުގެ 150 ދުވަސް ކުރި އައްޑޫގެ އާބާދީ 35000 އަށް އަރާނެ ކަމަށް ނުބެލެވެއެވެ.
ރައްޔިތުންގެމަޖިލީހުގެ އިންތިހާބީ ދާއިރާތައް ކަނޑައެޅުމުގެ ފައިނަލް ރިޕޯޓް އިލެކްޝަންސް ކޮމިޝަނުން ނެރޭނީ ހިނގަމުންދާ މަޖިލީހުގެ ދައުރު ހަމަވުމުގެ 150 ދުވަސް ކުރިންނެވެ.