ފެމިލީ ކޯޓުގެ އިސް ގާޒީ ކަމުގައި މަގާމުގައި ހުންނަވަނިކޮށް މުއްދަތެއް ނެތް ގޮތަށް ސަސްޕެންޑްކޮށްފައިވާ، ގާޒީ ހަސަން ސައީދުގެ ސަސްޕެންޝަން ޖުޑިޝަލް ސާވިސް ކޮމިޝަން (ޖޭއެސްސީ) އިން އުވާލައިފިއެވެ.
ގާޒީ ހަސަން ސައީދުގެ ސަސްޕެންޝަން ޖޭއެސްސީ އިން އުވާލާފައި މިވަނީ އެބޭފުޅާ ސަސްޕެންޑް ކުރިތާ 2 އަހަރަށް ވުރެ ގިނަ ދުވަސް ފަހުންނެވެ.
2016 ވަނަ އަހަރުގެ ފެބްރުއަރީ މަހުގެ ތެރޭގައި ގާޒީ ހަސަން ސަސްޕެންޑު ކުރީ އޭނާގެ ސުލޫކީ މައްސަލައެއް ޖޭއެސްސީ އިން ބަލަމުންދާތީ އެ މައްސަލަ ނިމެންދެންނެވެ.
ގާޒީ ހަސަންގެ ސަސްޕެންޝަން އުވާލުމަށް ނިންމާފައިވާ ކަން ކަށަވަރުކޮށްދީ، "މިހާރު" ނޫހަށް ދިން އިންޓަވިއުއެއްގައި ޖޭއެސްސީގެ ޑިރެކްޓަރު ހަސަން ޒަހީން ވިދާޅުވެފައިވަނީ، ސަސްޕެންޝަން އުވާލީ، ހަސަންގެ މައްސަލަ ނުބަލަން ނިންމާފައިވާތީ ކަމަށެވެ.
އައްޑޫއަށް ނިސްބަތްވާ ގާޒީ ހަސަން ސަސްޕެންޑް ކުރަން ޖޭއެސްސީން ނިންމި ނިންމުން ބާތިލްކުރަން އޭނާ ސިވިލް ކޯޓަށް ހުށަހެޅި ނަމަވެސް ފަހުން ވަނީ މައްސަލަ އަނބުރާ ގެންދަވާފައެވެ.
ގާޒީ ހަސަންގެ ސުލޫކީ މައްސަލައެއް ޖޭއެސްސީން ބަލަން ފެށީ، ފެމިލީ ކޯޓުގެ ސީނިއާ މެނޭޖްމަންޓާއެކު ބޭއްވި ބައްދަލުވުމެއްގައި، ހައިކޯޓުގެ 2 ފަނޑިޔާރުންނަކީ ދުނިޔޭގައި ތިބި އެންމެ ކޮރަޕްޓު ފަނޑިޔާރުން ކަމާއި، އެމީހުން އެ ހުރިހާ ކަމެއް ކުރަނީ ހިޔާބޮޑު ގަހެއްގެ ދަށުގައި ތިބެގެން ކަމަށް ދޭހަވާގޮތަށް ވާހަކަ ދެއްކެވި ކަމަށް ބުނެއެވެ.