ސްޕެއިނުގެ ބާސެލޯނާއަށް ކުޅެމުން އައި ފްރާންސްގެ ފުލްބެކް ލޫކަސް ޑިނޭ އިނގިރޭސި ކްލަބު އެވަޓަން އަށް ސޮއިކޮށްފިއެވެ.
ޑީނޭ އެވަޓަން އަށް ބަދަލުވެފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުން 18 މިލިއަން ޕައުންޑްގެ ފީ އަކަށް ކަމަށް މީޑިއާ ރިޕޯޓްތަކުގައިވެއެވެ.
ފްރާންސްގެ ލިއްލޭ އިން ފުޓްބޯޅަ ކެރިއަރު ފަށައި ފާއިތުވި ދެއަހަރު ދުވަހު ސްޕެއިނުގެ ބާސެލޯނާގައި ހޭދަކުރިއިރު އޭނާ ވަނީ އެޓީމާއިއެކު ސްޕެނިޝް ލީގާއި ސުޕަކަޕް އެއްފަހަރު ކާމިޔާބުކޮށް ސްޕެނިޝް ކަޕް ވެސް ދެފަހަރު ހޯދާފައެވެ.
އުމުރުން 25 އަހަރުގެ ޑީނޭ ވަނީ 2016 ވަނަ އަހަރު ފްރާންސްގެ ޕީއެސްޖީއިން ބާސެލޯނާއަށް ބަދަލުވެ މިހާތަނަށް އެކްލަބަށް 46 މެޗު ކުޅެދީފައެވެ. މީގެއިތުރުން، އޭނާ ވަނީ ޕީއެސްޖީ އަށް ކުޅުނު ދުވަސްވަރު ލޯން އެއްބަސްވުމެއްގެ ދަށުން އިޓަލީގެ ރޯމާ އަށް ވެސް ކުޅެފައެވެ.
އޭނާ ވަނީ 2014 ވަނަ އަހަރުން ފެށިގެން ފްރާންސްގެ ޤައުމީޓީމަށް މިހާތަނަށް 21 މެޗު ހަމަކޮށްފައެވެ. އެގޮތުން އޭނާ ވަނީ ފްރާންސްގެ ޤައުމީޓީމާއިއެކު 2016 ވަނަ އަހަރުގެ ޔޫރަޕިއަން ޗެމްޕިއަންޝިޕްގެ ދެވަނަ ހޯދާފައެވެ.
އެހެންނަމަވެސް، ބާސެލޯނާގައި ހޭދަކުރި ފާއިތުވި ދެސީޒަނުގައި އެކްލަބުގެ ފުރަތަމަ އެގާރައިން ޖާގަ ލިބިފައިނުވާތީވެ ނިމިދިޔަ ވޯލްޑްކަޕްގެ ތަށި ހޯދި ފްރާންސްގެ ޓީމުގައި ހިމެނިފައެއްނުވެއެވެ.
މިއީ އެވަޓަންގެ ކޯޗުކަމާއި ދާދިފަހުން ހަވާލުވި މާކޯ ސިލްވާ ގެނައި ދެވަނަ ކުޅުންތެރިޔާއެވެ. މީގެ ކުރީން، އޭނާ ވަނީ އެކްލަބުގެ ރެކޯޑް ފީ އަކަށް އޭނާގެ ކުރީގެ ކްލަބުކަމަށްވާ ވަޓްފޯޑްއިން ބްރެޒިލްގެ ރިޗާލިސަން ގެނެސްފައެވެ.