ދުނިޔޭގެ ޓްރާންސްފާ ބާޒާރުގައި ކުޅުންތެރިން ގަނެވިއްކާ އަގުތައް އުފުލަނީ މެންޗަސްޓާ ސިޓީ އާއި ޕީއެސްޖީއިން ކަމަށް ބަޔާންގެ ސީއީއޯ ކާލް ހެއިންޒް ރުމެނިގޭ ބުނެފިއެވެ.
މެންޗަސްޓާ ސިޓީ އަށާއި ޕީއެސްޖީއަށް ވަރަށް ބޮޑަށް ފާޑުކިޔަމުން ރުމެނިގާ ބުނެފައިވާ ގޮތުގައި، ޔޫއެފާ ޗެމްޕިއަންސް ލީގު ކާމިޔާބުކުރުމަށްޓަކައި ގިނަ އަދަދެއްގެ ފައިސާ ހޭދަކުރަން ކޮންމެހެން ނުޖެހޭނެ ކަމަށެވެ.
ރުމެނިގޭ ބުނިގޮތުގައި ބޮޑު ޚަރަދެއް ނުކޮށް ކާމިޔާބީތައް ހޯދިދާނެކަން ފާއިތުވި ސީޒަނުގައި ރެއާލް މެޑްރިޑުން ސާބިތުކޮށްދީފައިވާ ކަމަށެވެ.
"ޔޫއެފާ ޗެމްޕިއަންސް ލީގު ކާމިޔާބުކުރުމަށްޓަކައި ގިނަ އަދަދެއްގެ ފައިސާ ހޭދަކުރަން ކޮންމެހެން ނުޖެހޭނެކަން ރެއާލް މެޑްރިޑުން ސާބިތުކޮށްދީފި. ވޭތުވެދިޔަ އަހަރުތަކުގައި އެމީހުން އެހާ ބޮޑު ޚަރަދެއް ކޮށްފައެއް ނެތް." ރުމެނިގާ ބުންޏެވެ.
ރުމެނިގާ މިހެން ބުނެފައިވާއިރު، އިންގްލެންޑްގެ މެންޗެސްޓަރ ސިޓީއަށް ބޮޑުއަގުގައި އިތުރު ކުޅުންތެރިއެއް ނުގެންދާނެކަމަށް އެކްލަބުގެ ކޯޗް ޕެޕް ގާޑިއޯލާ ވަނީ ވަރަށް ފަހުން ބުނެފައެވެ.
އެކަމާއި ބެހޭގޮތުން ފާޑުކިޔަމުން ރުމެނިގާ ބުނީ، ގާޑިއޯލާގެ ވާހަކަތައް އަޑުއިވުމުން އެންމެ ފުރަތަމަ ހައިރާންކަން ލިބުނު ކަމަށެވެ. އަދި އިނގިރޭސިވިލާތުގެ ޓްރާންސްފާ ބާޒާރު ބަންދުވަންދެން އެގޮތުގައި ގާޑިއޯލާ ހުންނާނެ ކަމަށް އުއްމީދު ކުރާކަމަށެވެ.
އެންމެފަހުގެ ޕްރިމިއާ ލީގްގެ ޗެމްޕިއަން މެންޗެސްޓަރ ސިޓީއިން މިފަހަރުގެ ޓްރާންސްފާ ބާޒާރުގައި މިހާތަނަށް ގެންގޮސްފައިވަނީ އެންމެ ދެކުޅުންތެރިންނެވެ. އެއީ ލެސްޓާ ސިޓީ އިން އެކްލަބުގެ ރެކޯޑް ފީ އަކަށް ގެންދިޔަ ރިޔާދު މާރޭޒްގެ އިތުރުން ފްރީ ޓްރާންސްފާގައި ހޮލެންޑްގެ ކްލަބު ޒްވޮލް އިން ބަދަލުވި ޒުވާން ޑިފެންޑަރު ފިލިޕް ސޭންޑްލާ އެވެ.