އައްޑޫ ސިޓީ ހިތަދޫގައި ރަނގަޅު ފެންވަރުގެ ޖިމެއް ގާއިމް ކުރުމަށް ރައީސް ޔާމީންގެ ސަރުކާރުން ވައުދުވިތާ 4 އަހަރަށް ވުރެ ގިނަ ދުވަސް ވެއްޖެއެވެ. އެ ޖިމަށް ބޭނުންވާ ސާމާން ހޯދުމަށް ބިޑަށް ހުޅުވާލީ، 29 އޯގަސްޓް 2016 ގައެވެ.
އެ ދުވަހުން ފެށިގެން މިއަދާއި ހަމައަށް ވެސް ހިތަދޫ ޖިމު ގާއިމް ކުރުމާއި ބެހޭގޮތުން ޔޫތް މިނިސްޓްރީގެ ބަހެއް ނުލިބެއެވެ. އެހެނަސް އައްޑޫގައި ތިބި އެ މިނިސްޓްރީގެ ކޯޑިނޭޓަރުން "ޖިމް ސާމާނު ބޯޓަށް އަރުވައިފި" ކަމަށް ބުނެ ރަށު ތެރޭގައި ވާހަކަ ދައްކާތާ ދުވަސްތަކެއް ވަނީ ވެފައެވެ.
އެއީ ކޮން ބޯޓެއް ކަމާއި އެ ބޯޓު ފުރާނެ ދުވަހެއް ވެސް ބުނެއެއް ނުދެއެވެ. ހަމައެކަނި ވާހަކަ އަކީ، "ޖިމް ސާމާނު ބޯޓަށް އަރުވައިފި" އެވެ.
2016 ވަނަ އަހަރުގެ އޯގަސްޓް މަހުގެ ތެރޭގައި 'އައްޑޫލައިވް' އާއި ވާހަކަ ދައްކަމުން ޔޫތް މިނިސްޓްރީގެ ޕާމަނަންޓް ސެކްރެޓަރީ ވިދާޅުވެފައި ވަނީ، "ތަކެތި ލިބުމާއި އެކު ފަށަންވީ" ކަމަށެވެ.
ހިތަދޫ ޒުވާނުންގެ މަރުކަޒުގައި އަމިއްލަ ފަރާތެއްގެ އިކުއިޕްމަންޓާއި އެކު ހިންގަމުން ދިޔަ ޖިމް ހުއްޓާލުމަށް އެންގީ ރައީސް ޔާމީންގެ ސަރުކާރުގައި 2014 ވަނަ އަހަރުއެވެ. އޭރު އެގޮތަށް ސަރުކާރުން އެންގީ ޖިމް ތަރައްޤީ ކުރުމަށް ކަމަށް ބުނެއެވެ.
ހިތަދޫގައި ހިންގަމުން ދިޔަ ޖިމް ހުއްޓާލުމާއި ގުޅިގެން އެތަން ބޭނުން ކުރަމުން ދިޔަ ޒުވާނުން ދަނީ ޖިމެއް ނެތުމުގެ ކަންބޮޑުވުން ފާޅުކުރަމުންނެވެ.
ސަރުކާރުގެ ވަފުދުތައް އައްޑޫއަށް ވަޑައިގަންނަވާ ކޮންމެ ފަހަރަކު ޒުވާނުން އެ ޝަކުވާތައް ކުރެއެވެ. އެހެން ނަމަވެސް އެއީ މިހާތަނަށް އައި އިރު ވެސް އެކަމަށް ހައްލެއް ލިބިފައެއް ނުވެއެވެ. އައްޑޫގައި ތިބި ކޯޑިނޭޓަރުން ވެސް ބުނަނީ، "ޖިމް ސާމާނު ބޯޓަށް އަރުވައިފި" ކަމަށެވެ.