މި އަހަރުގެ ރިޔާސީ އިންތިހާބުގައި ރައީސް އަބްދުﷲ ޔާމިން ވާދަ ނުކުރާނެ ކަން މިހާރު ޔަގީން ވެފައިވާ ކަމަށް ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރު ވިދާޅުވެއްޖެ އެވެ.
ރޭ ގުޅިފައިވާ ސިޔާސީ ޕާޓީތަކުން ބޭއްވި ބައްދަލު ކުރެއްވުމެއްގައި ސަމީރު ވިދާޅުވީ، މިއަދާ ހަމައަށް އައިއިރު ވެސް އިންތިހާބުގައި ވާދަކުރުމަށް ޔާމިން އިލެކްޝަނަށް ފޯމް ވެސް ހުށަހަޅާފައި ނުވާ ކަމަށެވެ.
އެހެންވެ އިންތިހާބުގައި ރައީސް ޔާމީން ވާދަނުކުރައްވާނެ ކަން މިހާރު ޔަގީންވެފައިވާ ކަމަށެވެ.
ސަމީރު ވިދާޅުވި ގޮތުގައި، ރައީސް ޔާމީނަކީ ރައްޔިތުންގެ ތާއިދު ނެތް ބޭފުޅެއް ކަމަށާއި އެެފަދަ ބޭފުޅަކު ރައީސް ކަމަށް ކުރިމަތި ލައްވައިގެން ތާއިދު ނުލިބޭނެކަން ހުދު ރައީސް ޔާމީން ވެސް ގަބޫލުކުރައްވާ ކަމަށެވެ.
"ޔާމިން އިންތިހާބުގައި ވާދަނުކުރާނެ ކަން މިހާރު ވަނީ ޔަގީން ވެފައި, ރައްޔިތުންގެ ތާއިދު ނެތް ބޭފުޅަކު އެފަދަ މަގާމަކަށް ކުރިމަތި ލައްވައިގެން ތާއިދު ނުލިބޭނެކަން ހުދު އެމަނިކުފާނު ވެސް މިހާރު ގަބޫލު ކުރައްވާ" ސަމީރު ވިދާޅުވި އެވެ.
މީގެ އިތުރުން ސަމީރު ވަނީ، ސަރުކާރުން ވޯޓުލާ މީހުންގެ އަދަދު މަދުކުރަން މަސައްކަތް ކުރަމުން ގެންދާ ކަމަށް ވެސް ތުހުމަތުކޮށްފައެވެ.