ހުވަދު އަތޮޅުގެ ރަށްތަކަށް ކުރެއްވި ކެމްޕެއިން ދަތުރުފުޅުގައި "ބެޔަސް ނުބެޔަސް ދިހަ ހާސް ރުފިޔާ" ލިބުނު މަސްވެރިޔަކާއި ބައްދަލުވެވަޑައިގެންފައި ނުވާކަމަށް ރައީސް އަބްދުﷲ ޔާމީންގެ ރަނިން މޭޓް ޑރ. މުހައްމަދު ޝަހީމް އަލީ ސަޢީދު ވިދާޅުވެއްޖެއެވެ.
"ބެޔަސް ނުބެޔަސް ދިހަ ހާސް" އަކީ، 2013 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގެ ދުވަސްވަރު މަސްވެރިންނަށް ރައީސް އަބްދުﷲ ޔާމީން ވެވަޑައިގެންނެވި ވައުދެކެވެ. އެހެން ނަމަވެސް މިހާތަނަށް އެ ފައިސާ އެއްވެސް މަސްވެރިޔަކަށް ލިބުނު ކަމެއް ސަރުކާރުން ހާމަކޮށްފައެއް ނުވެއެވެ.
'ސަންގު ޓީވީ' ގައި ވާހަކަ ދައްކަވަމުން ޑރ. ޝަހީމް ވިދާޅުވި ގޮތުގައި، ހުވަދު އަތޮޅަށް ކުރެއްވި ޒިޔާރަތުގައި ވަރަށް ގިނަ މަސްވެރިންނާއި ވާހަކަ ދެއްކެވި ކަމަށެވެ. އެގޮތުން ވާހަކަ ދެއްކެވި މަސްވެރިންގެ ތެރެއިން އެއްވެސް މަސްވެރިޔަކު "ބެޔަސް ނުބެޔަސް ދިހަ ހާސް ރުފިޔާ" ލިބުނު ވާހަކަ ބުނެފައި ނުވާކަމަށް ޝަހީމް ވިދާޅުވިއެވެ.
ޑރ. ޝަހީމް ވިދާޅުވި ގޮތުގައި އެބޭފުޅާ ވާހަކަ ދެއްކި ބައެއް މަސްވެރިން މަސް ކިރުމަށް ފަހު ފައިސާ ނުލިބޭ ވާހަކަ ހިއްސާކުރި ކަމަށެވެ. އެހެން ނަމަވެސް މަސް ކިރުވުމަށް ފަހު ފައިސާ ނުލިބި ހަފްތާއަކަށް ވުރެ ގިނަ ދުވަސް ނުވާކަމަށް ޝަހީމް ވިދާޅުވިއެވެ.