ކުރީގެ ނައިބު ރައީސް އަހުމަދު އަދީބުގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާ އާއި ގުޅިގެން މިއަދު ކްރިމިނަލް ކޯޓުގައި ތާވަލު ކުރި ޝަރީޢަތުގެ އަޑުއެހުން އެންމެ ފަހު ވަގުތު ކެންސަލްކޮށްފިއެެވެ.
މިއަދު ތާވަލް ކުރި އަޑުއެހުމަކީ، ސިފައިންގެ ބަޑިގުދަނުން ބަޑި ގެއްލުނު މައްސަލާގައި އަދީބުގެ މައްޗަށް ދައުލަތު އުފުލާފައިވާ ދައުވާގެ އަޑުއެހުމެކެވެ.
އެ މައްސަލަ ކްރިމިނަލް ކޯޓުގައި މިއަދު ހެނދުނު 10:00 ގައި ބޭއްވުމަށެވެ. މިއަދުގެ އަޑުއެހުން ކެންސަލް ވެފައިވާކަން އަދީބުގެ އަނބިކަނބަލުން މަރިޔަމް ނަޝްވާ ކުރެއްވި ޓްވީޓެއްގައި ވަނީ ޔަގީންކޮށްދެއްވާފައެވެ.
ޓެރަރިޒަމްގެ ދައުވާގެ އިތުރުން ހިޔާނާތުގެ އެތައް މައްސަލައެއް އަދީބުގެ މައްޗަށް ކްރިމިނަލް ކޯޓުގައި މިހާރުވެސް ކުރިއަށް އެބަ ގެންދެއެވެ. މިހުރިހާ ދައުވާތަކެއް ކުރިއަށް ގެންދާއިރު، އަދީބު މިހާރު ވެސް ގެންދަވަނީ 33 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.