ދިވެހި ރައްޔިތުންނަށް ލިބިފައިވާ ވޯޓުލުމުގެ ހައްގަށް އުނިކަން ލިބޭގޮތަށް ސަރުކާރާއި އިލެކްޝަންސް ކޮމިޝަނުން އަމަލުކުރަމުންދާތީ އެކަމުގެ ކަންބޮޑުވުންތައް ހިއްސާކުރުމަށް އިދިކޮޅު ފަރާތްތަކުން މިއަދު ހިއުމަން ރައިޓްސް ކޮމިޝަން (އެޗްއާރސްީއެމް) އާއި ބައްދަލުކޮށްފިއެވެ.
މި ބައްދަަލުވުމުގައި ގުޅިފައިވާ ސިޔާސީ ޕާޓީތަކުގެ މަންދޫބުން ވަނީ ބައިވެރިވެ ވަޑައިގެން އެބޭފުޅުންގެ ކަންބޮޑުވުންތައް ވަނީހިއްސާކޮށްފައެވެ.
އެޗްއާރްސީއެމް އާއި އެކު ބާއްވާ ބައްދަލުވުމާއި ބެހޭގޮތުން ކުރެއްވި ޓްވީޓެއްގައި ކެންދޫ ދާއިރާގެ މެންބަރު އަލީ ހުސައިން ވިދާޅުވީ، ވޯޓު ލުމުގެ ހައްގު ލިބޭނެކަން ކަށަވަރުކޮށްދިނުމަސް އެޗްއާރްސީއެމް އާއި އެކު ބައްދަލުކުރަމުން ގެންދާ ކަމަށެވެ. އަދި އެޗްއާރްސީއެމް އަކީ ހަމައެކަނި ރިޕޯޓު ލިޔެފައި އިންޓަނެޓަށް ލާން ތިބޭ ބައެއް ނޫން ކަމަށް ވެސް އަލީ ހުސައިން ވަނީ ވިދާޅުވެފައެވެ.
އިދިކޮޅު ސިޔާސީ ޕާޓީތަކުން އިންތިހާބާއި ގުޅޭގޮތުން އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރަނީ، ރީރަޖިސްޓާ ކުރަން ހުޅުވާލުމުން ޕީޕީއެމުން އެއްކުރާ ފޯމްތައް އިލެކްޝަންސް ކޮމިޝަނަށް ހުށަނޭޅުމެވެ. އިދިކޮޅު ފަރާތްތަކުން ތުހުމަތު ކުރާ ގޮތުގައި ޕީޕީއެމުން އެގޮތަށް އަމަލުކުރަނީ، ވޯޓުލާ ފަރާތްތަކުގެ އަދަދު މަދު ކުރުމަށެވެ.
ސަރުކާރުގެ ބައެއް އޮފީސްތަކުގެ މުވައްޒަފުންނަށް ވެސް އޮފީސް މެދުވެރިކޮށް ރީރަޖިސްޓަރ ކުރުމަށް ވަނީ އަންގާފައެވެ. އެ މުވައްޒަފުން ލައްވައި ފުރުވި ފޯމުތައް ޕީޕީއެމްގެ އޮފީހަށް ގެންދިޔަ ކަން ވަނީ ފަޅާއަރާފައެވެ.