ޓީވީ ޕްރޮގްރާމެއްގައި ޕްރެޒެންޓަރަކު ކުރި ސުވާލަކާއި ގުޅިގެން، އެ ސުވާލު އަމާޒު ކުރެއްވި، ވީޑިއޯގައި ހުރީ ހަގީގަތުގައި ވެސް ރައީސް ޔާމީންގެ އަޑުކަން ޔަގީންކޮށްދިނުމަށް، ޑރ. މުހައްމަދު ޝަހީމް އަލީ ސައީދު އެދިވަޑައިގެންފިއެވެ.
ރައީސް ޔާމީންގެ ރަނިން މޭޓް، ޑރ. ޝަހީމް މިގޮތަށް އެދިވަޑައިގެންފައިވަނީ، ރޭ ސަންގު ޓީވީގައި ގެނެސްދިން ޕްރޮގްރާމެއްގައެވެ. އެ ޕްރޮގްރާމުގައި ޕްރެޒެންޓަރު ޝަހީމް އާއި ސުވާލުތައް އަމާޒު ކުރެއްވުމުގެ ކުރިން ރައީސް ޔާމީން ކުރިން ދައްކަވާފައިވާ ވާހަކަފުޅެއްގެ ވީޑިއޯ ދައްކައެވެ.
ވީޑިއޯގައި ރައީސް ޔާމީން ވިދާޅުވެފައިވަނީ، "އަޅުގަނޑުމެންނަށް އެނގެއޭ ހަމަ ހުރިހާ ބޭފުޅުން ވެސް، ހާއްސަކޮށް ހުރިހާ ފިރިހެން ބޭފުޅުން ބެންކޮކަށް ވަޑައިގަންނަވާ. ހަމަގައިމު ވެސް އަންހެން ބޭފުޅުން ހޯއްދަވަނީ ހިލޭއެއް ނޫން. އެހެންވީމަ ހިލޭ އަންހެނުންނެއް ނޫން." ކަމަށެވެ.
ވީޑިއޯ ދެއްކެވުމަށް ފަހު ޕްރެޒެންޓަރު ސުވާލު ކުރެއްވުމުން ޝަހީމް ވަނީ އެކަމާއި ބެހޭގޮތުން ވާހަކަ ދެއްކެވުމަށް ދެކޮޅު ހައްދަވާފައެވެ. އަދި ޝަހީމް ވިދާޅުވީ، "ޓީވީގައި އެގެންނެވީ އެމަނިކުފާނުގެ އަޑުކަން ވެސް އަޅުގަނޑަށް ކަށަވަރުކޮށްދެއްވަން ޖެހޭނެ" ކަމަށެވެ.