ދެކުނު އެފްރިކާގެ ޖޮހޮނަސްބާގް އިން އައްޑޫ ސިޓީ، ގަމަށް ކުރާ ދަތުރުތައް ނޮވެމްބަރު މަހުގެ 24 ވަނަ ދުވަހު ފަށާނެ ކަމަށް ފަތުރުވެރިކަމާއި ބެހޭ ވަޒީރު މޫސާ ޒަމީރު ވިދާޅުވެއްޖެއެވެ.
ފަތުރުވެރިކަމާއި ބެހޭ ވުޒާރާގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޒަމީރު ވިދާޅުވީ، ދެކުނު އެފްރިކާ އިން ގަމަށް ދަތުރުކުރަން ފަށާއިރު "ފޭސް އެކެއް ދަށުން ހަފްތާއަކު ތިން ފްލައިޓް ބާއްވާނެ" ކަމަށެވެ.
އަދި ފޭސް ދޭއްގެ ދަށުން 2019 ވަނަ އަހަރުގެ ޖެނުއަރީ މަހު އިތުރު ދަތުރުތަކެއް ބާއްވާނެ ކަމަށް ޒަމީރު ވިދާޅުވިއެވެ.
ގަމަށް ދަތުރުތައް ކުރާނީ ސައުތު އެފްރިކަން އެެއާލައިންސް އިންނެވެ. މި ދަތުރުތަކުގައި ބޭނުންކުރާނީ، 300 ޕަސިންޖަރުން އުފުލޭ އާބަސް އޭ340 ގެ މަތިންދާބޯޓެވެ.
ޒަމީރު ވިދާޅުވި ގޮތުގައި، ސައުތު އެފްރިކާ އިން އައްޑުއަށް ދަތުރުތައް ފެށުމުން ރާއްޖެއަށް ތާޒާ މޭވާއާއި ތަރުކާރީތައް އެތެރެކުރުމަށް ފަސޭހަވެ ފަތުރުވެރިކަމުގެ ސިނާއަތުގެ އިތުރަށް ވިޔަފާރިތައް ވެސް ކުރިއަރައިގެން ދާނެ ކަމަށެވެ.
ސައުތް އެފްރިކާއިން ރާއްޖެއަށް ކުރާ ދަތުރުތަކަށް ހޭދަވާނެ ކަމަށް ބެލެވެނީ 7 ގަޑިއިރެވެ. މިހާރު އެގައުމުން ރާއްޖެއަށް ފަތުރުވެރިން ރާއްޖެ އަންނަނީ ދުބާއީ ނުވަތަ ގަތަރު މަގުންނެވެ. އެހެން ދަތުރުކުރާއި ގާތްގަނޑަކަށް 16 ގަޑި އިރު ހޭދަ ކުރަން ޖެހެއެވެ.