މިއަދު ހަވީރު އައްޑޫގެ ގުޅިފައިވާ އަވަށްތަކުގައި ބާއްވަން ހަމަޖެއްސި "ޖަޒީރާ ވެހިކަލް ބުރު" އެހެން ދުވަހަކަށް ފަސްކޮށްފިއެވެ.
ވެހިކަލް ބުރު އިންތިޒާމް ކުރުމުގައި އުޅޭ ފަރާތުން މައުލޫމާތު ދިން ގޮތުގައި ވެހިކަލް ބުރު ފަސްކުރީ، އައްޑޫގައި ތިބި އެމްޑީޕީގެ ގިނަ އެކްޓިވިސްޓުންތަކެއް ރީރަޖިސްޓްރޭޝަން މަސައްކަތުގައި ވަރަށް ބުރަކޮށް އުޅޭތީ ކަމަށެވެ.
"އަޅުގަނޑުމެންގެ ގިނަ ޓީމުތަކެއް މިވަގުތު ތިބި މާލޭގައި ރީރަޖިސްޓްރޭޝަނަށް. އެބޭފުޅުންނަށް މިކޮޅަށް އާދެވޭ ގޮތް ނުވުމުން ފަސްކުރީ." އެމްޑީޕީ ފޭދޫ ދާއިރާގެ އޮފީހުން ވާހަކަ ދެއްކި މީހަކު ބުންޏެވެ.
މާލޭގައި ދިރިއުޅުއްވާ އައްޑޫގެ ރައްޔިތުންނަށް ރީރަޖިސްޓްރޭޝަން މަސައްކަތުގައި އެހީތެރިކަން ފޯރުކޮށްދިނުމަށް އައްޑޫގެ އެކި އަވަށްތަކުން ޓީމުތައް ދަނީ ހަރަކާތްތެރިވަމުންނެވެ. އެ ޓީމުތަކުގައި އެމްޑީޕީ އާޢި އިދިކޮޅު ސިޔާސީ ޕާޓީތަކުގެ އިސް ބޭފުޅުން ހިމެނެއެވެ.