އެއިރޯ މެކްސިކޯގެ ފްލައިޓް 2431 ރަންވޭއިން ނައްޓާލަން ތައްޔާރުވަމުން ދިޔައިރު އެ ފްލައިޓުން ދަތުރުކުރި އުމުރުން 17 އަހަރުގެ ގާސިޔާ ބުނާގޮތުން އޭނާ އަށް ކޮންމެވެސް ބިރުވެރިކަމެއް ވާން އުޅޭ ކަމުގެ އިހްސާސް ކުރެވުނެވެ. ފްލައިޓް ނައްޓާލަން ތައްޔާރުވި އިރު ބޯކޮށް ވާރޭ ވެހެމުން ދިޔައިރު ވައި ވެސް އެހާ ގަދައެވެ.
ފްލައިޓްގެ ފިޔަގަނޑާއި ދިމާލަށް ވިންޑޯ ސީޓެއްގައި ހުރި ގާސިޔާ ބުނާ ގޮތުގައި ކުޑަދޮރުން ބަލާލިއިރު މުޅި ހިސާބުން ފެންނަން އޮތީ ގަދަ އަޅި ކުލައިގެ ބޯ ވިލާތައް ކަމަށެވެ.
މޫސުމް ގޯސްކޮށް އޮތް ނަމަވެސް، ފްލައިޓްގެ ޕައިލެޓުން ގަސްތު ކުރީ ރައްވޭ އިން ބޯޓު އުދުއްސާލުމަށެވެ. އެހެން ނަމަވެސް ބޯޓު އުދުއްސާލުމާއި އެކު ހެން އޭގެ ފިޔަގަނޑު ވަރަށް ބާރަށް ތެޅެން ފެށި ކަމަށް ގާސިޔާ ބުންޏެވެ.
ފްލައިޓުގެ ފިޔަގަނޑު ގަދައަށް ތެޅެން ފެށުމުން ގާސިޔާާ ވަނީ އޭނާގެ ފޯނ ނަގައި އެ މަންޒަރުތައް ވީޑިއޯ ކުރަން ފަށާފައެވެ.
އޭގެ ކުޑަ ހިނދުކޮޅެއްގެ ތެރޭގައި ގަދަ ވަޔާއި އެކު ފްލައިޓް އެނބުރެމުން ކަހަލަ ގޮތަކަށް ވެއްޓުނީއެވެ. ގާސިޔާ ބުނެފައިވާ ގޮތުގައި، ފްލައިޓް ވެއްޓުމަށް ފަހު ބިމުގައި ޖެހިފައި ވިއްސައިގެން ދިޔަ ކަމަށެވެ.
ފްލައިޓް މަޑުވި ގޮތަށް އަލިފާން ރޯވާން ފެށިއެވެ. އެހެން ނަމަވެސް އަލިފާންގަނޑު ފެތުރުމުގެ ކުރިން ގާސިޔާގެ އިތުރުން ގިނަ ޕަސެންޖަރުން ވަނީ ބޯޓުން ފައިބާފައެވެ.
"އަހަރެން އަސްލު ހިއެއް ނުކުރަން ސަލާމަތް ވެވޭނެ ކަމަށް" ގާސިޔާ ބުންޏެވެ.
ފްލައިޓް ވެއްޓުމުގެ ނުރައްކާތެރި ހާދިސާއިން ސަލާމަތްވުމުން ހައިރާންކަން ލިބުނީ ހަމައެކަނި ގާސިޔާއަކަށް ނޫނެވެ. އޭނާ އާއި އެކު އެ ފްލައިޓުން ދަތުރުކުރި 99 ޕަސިންޖަރުންނާއި 4 ކްރޫން ވެސް ތިބީ ސަލާމަތްވި ގޮތާއި މެދު ހައިރާން ވެފައެވެ.
Today I faced my biggest fear. Nothing can describe how I felt in that moment but I have no one to thank except God, for giving me the opportunity to come out alive and well. I will forever be counting my blessings ?❤️ pic.twitter.com/XUG3FA9q37
— Ashley Garcia (@thenamesashleyy) August 1, 2018
ފްލައިޓުން ދަތުރު ކުރި 17 މީހަކަށް އެކިވަރުގެ އަނިޔާ ލިބިފައިވާއިރު އެމީހުންނަށް ދަނީ ހޮސްޕިޓަލުގައި ފަރުވާ ދެމުންނެވެ.
"އަހަރެން ދަރިފުޅުގެ އަތުގައި ހިފައިގެން ދުއްވައިގަތީ އަހަންނަށް ދެވުނު އެންމެ ބާރަކަށް" ޑޮރިއެއްލާ ރިވޭރާ ބުންޏެވެ. "އަހަރެން ހީކުރީ އަހަންނަށް ދަރިފުޅުގެ އަތުގައި ހިފުނު ގޮތުން އޭނާގެ އަތް ބިންދައިގެން ދާނެ ކަމަށް"
ފްލައިޓުގެ އެމަޖެންސީ ސްލައިޑްތަކުން ޕަސިންޖަރުން ފައިބަމުން ދިޔައިރު ފްލައިޓްގައި ދިޔައީ އަލިފާން ރޯވަމުންނެވެ.
މީގެ އިތުރުން ފްލައިޓް ވެއްޓުމުގެ ހާދިސާގައި ސަލާމަތްވި އެހެން ޕަސެންޖަރެއް ކަމުގައިވާ އަލް ހެރޭރާ ސިފަކުރީ އޭނާ އުޑުން ވެއްޓި ސަލާމަތް ވުން ގޮތުގައެވެ.
"ފްލައިޓްތައް ވެއްޓުމުގެ ހާދިސާތަކުގައި މީހުން މަރުވޭ، އެހެން ނަމަވެސް އަހަރެން ސަލާމަތްވެ އެހެން ފްލައިޓެއްގައި މި ނައްޓާލަނީ." ޗިކާގޯ އަށް ދާން ވެގެން ފުރަން އެއާޕޯޓުގައި ހުރެ ސީއެންއެން އާއި ވާހަކަ ދައްކަމުން ހެރޭރާ ބުންޏެވެ.
ފްލައިޓް ވެއްޓުމުގެ ހާދިސާ މެކްސިކޯގެ ކަމާއި ބެހޭ ފަރާތްތަކުން ތަހުގީގް ކުރަމުން އަންނައިރު، ފްލައިޓުން ދަތުރުކުރި އެންމެން ސަލާމަތްވުން އެމީހުން ވެސް ފާހަގަކުރަނީ އަޖައިބެއްގެ ގޮތުގައެވެ.