އައްޑޫ ސިޓީ ކައުންސިލް އިދާރާގެ އިމާރާތަށް ވަގުން ވަދެ ގެންދިޔަ ތަކެތީގެ ތެރޭގައި އެ އިމާރާތުގައި ހިންގާ ޑިޕާޓްމަންޓް އޮފް ނެޝެނަލް ރެޖިސްޓްރޭޝަން (ޑީއެންއާރް)ގެ އައްޑޫ ޔުނިޓްގެ ބައެއް ތަކެތި ހިމެނޭކަމަށް އައްޑޫ ސިޓީ ކައުންސިލުން ބުނެފިއެވެ.
ޑީއެންއާރުގެ އައްޑޫ ޔުނިޓް، އާންމު ނަމުން ނަމަ އައިޑީ ކާޑް ޔުނިޓް ހިންގަނީ ކައުންސިލް އިދާރާގެ ގްރައުންޑް ފްލޯގައި ގާއިމްކޮށްފައިވާ ހިތަދޫ އަވަށު އޮފީހުގައެވެ.
އައްޑޫ ސިޓީ ކައުންސިލްގެ ޒިންމާދާރު ވެރިޔާ ސައުދީ ވިދާޅުވި ގޮތުގައި، މިހާތަނަށް ބެލި ބެލުމުން ޑީއެންއާރް އައްޑޫ ޔުނިޓްގެ ދެ ކެމެރާއެއް ވަގުން ގެންގޮސްފައިވާ ކަމަށް މައުލޫމާތު ލިބިފައިވާ ކަމަށެވެ. އޭގެ އިތުރުން އެހެން އެއްޗެއް ވަގަށް ގެންދިޔަ ކަމުގެ މައުލޫމާތެއް ނުލިބޭ ކަމަށް ސައުދީ ވިދާޅުވިއެވެ.
ސައުދީ ވިދާޅުވި ގޮތުގައި، ކައުންސިލް އިދާރާގެ ފައިނޭންސް ޔުނިޓާއި ޕްލޭނިން ސެކްޝަނުން ވެސް ބައެއް ތަކެތި ވަގުން ގެންގޮސްފައިވާ ކަމަށެވެ. އެގޮތުން ގެންދިޔަ ތަކެތީގެ ތެރޭގައި ލެޕްޓޮޕާއި ފައިނޭންސް ޔުނިޓްގެ ވަތްގަނޑުތަކުގައި ހުރި ފައިސާ ވެސް ހިމެނޭ ކަމަށެވެ.
އައްޑޫ ސިޓީ ކައުންސިލް އިދާރާއަށް ވަގުން ވަން މައްސަލަ ހިތަދޫ ޕޮލިސް ސްޓޭޝަނުން މިހާރު ގެންދަނީ ތަހުގީގް ކުރަމުންނެވެ.