ގުޅިފައިވާ ސިޔާސީ ޕާޓީތަކުގެ ވެރިކަމެއްގައި އެއްވެސް ރައްޔިތަކު ތަފާތުކުރުމެއް ނެތި އިންސާފު ގާއިމްކޮށްދެއްވާނެ ކަމަށް، އެ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގެ ރަނިންމޭޓް ފައިސަލް ނަސީމް ވިދާޅުވެއްޖެއެވެ.
ފައިސަލް މިހެން ވިދާޅުވީ، ޖުމްހޫރީ ޕާޓީގެ 10 ވަނަ އަހަރީ ދުވަސް ފާހަގަކުރުމަށް ހުކުރު ދުވަހުގެ ރޭ މ.ކުނޫޒްގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ފައިސަލް ވަނީ ގުޅިފައިވާ ޕާޓީތަކުގެ ވެރިކަމެއްގައި ތަފާތުކުރުމެއް ނެތި އިންސާފު ގާއިމްކޮށްދޭނެ ކަމުގެ ޔަގީންކަން އަރުވާފައެވެ.
އަދި އެއްވެސް ހާލެއްގައި އިދިކޮޅު ކޯލިޝަނުގެ ވެރިކަމެއްގައި ވަކި ގޮތަކަށް މައްސަލަ ނިންމަން ފަނޑިޔާރުގެއަށް އަތް ނުބާނާނެ ކަމަށް ވެސް ފައިސަލް ވިދާޅުވިއެވެ.
ފައިސަލް އިތުރަށް ވިދާޅުވި ގޮތުގައި ކޯލިޝަންގެ ސަރުކާރެއްގައި މިނިވަން މުއައްސަސާތަކުގެ ވެރިންނަން މިނިވަންކަމާއި އެކު މަސައްކަތް ކުރުމުގެ ފުރުސަތު ވެސް ލިބިގެންދާނެއެވެ.