ރައީސް އަބްދުﷲ ޔާމީންގެ އަމިއްލަފުޅު އެކައުންޓަށް 1 މިލިއަން ޑޮލަރު ޖަމާކުރި ކަމަށް ބުނެ އަޑުތަކެއް ފެތުރެން ފެށުމާއި އެކު ގިނަ ބަޔަކު އެކަމާއި ކަންބޮޑުވުން ފާޅުކުރަން ފެށިއެވެ. އެއް ބަޔަކު އެއީ ސާބިތު ނުހިފޭ ދޮގު ވާހަކައެއް ކަމުގައި ބުނަން ފެށިއެވެ.
އެފަދަ ގޮތަކަށް ރައީސް ޔާމީންގެ ދިފާޢުގައި ވާހަކަތައް ދައްކަމުން ދަނިކޮށް، ސޯޝަލް މީޑިޔާގައި ރައީސް ޔާމީންގެ އެކައުންޓަށް ޖަމާކުރި ކަމަށް ބުނާ 1 މިލިއަން ޑޮލަރުގެ ޑެޕޮޒިޓް ސްލިޕްތައް އާއްމުވިއެވެ.
އެހިސާބުން ދެން އިވެގެން ދިޔައީ، އެއީ ރައީސް އަބްދުﷲ ޔާމީން "ފްރޭމް" ކުރުމަށް ކުރީގެ ނައިބު ރައީސް އަހްމަދް އަދީބު އަޑީގައި ހުންނަވައި ހިންގެވި ޖަރީމާއެއްގެ ގޮތުގައެވެ.
ރަސްމީ އިދާރާއެއްގެ ބަހެއް "1 މިލިއަން ޑޮލަރުގެ މައްސަލަ" އާއި ބެހޭގޮތުން ނެތި ގިނަ ދުވަސްތަކެއް ފާއިތުވުމަށް ފަހު، ރަސްމީކޮށް އެކަން ހާމަކުރީ 2017 ވަނަ އަހަރުގެ ނޮވެމްބަރު މަހުގެ ތެރޭގައި އެންޓި ކޮރަޕްޝަން ކޮމިޝަން (އޭސީސީ) އިންނެވެ.
އޭސީސީ އިން ނެރުނު ރިޕޯޓްގައި ބުނެފައިވަނީ ދެ ފަހަރެއްގެ މަތިން ރައީސް އަބުދުﷲ ޔާމީންގެ އެކައުންޓަށް އަމިއްލަ ކުންފުންޏެއް ކަމަށްވާ އެސްއޯއެފް ކުންފުނިން އެއް މިލިއަން ޑޮލަރު ޖަމާކޮށްފައިވާ ކަމަށެވެ. އަދި އެކަމާއި ބެހޭގޮތުން އެސްއޯއެފް އާއި ސުވާލުކުރަން ބެލިއިރު، އެކުންފުނީގެ ފަރާތުން އެކަން ކުރި މީހުން ރާއްޖޭގައި ނެތުމުން ކަމަށް ބުނެ އޭސީސީން ވަނީ މައްސަލަ ފައިލްކޮށްފައެވެ.
އޭސީސީ އިން ރައީސް ޔާމީންގެ އެކައުންޓަށް 1 މިލިއަން ޑޮލަރު ޖަމާކުރި ކަން ޔަގީންކޮށްދިނުމާއި އެކު އަނެއްކާވެސް ރައީސް ޔާމީނަށް ބޮޑެތި ފާޑުކިޔުންތައް އަމާޒުވިއެވެ.
އޭގެ ފަހުން 1 މިލިއަން ޑޮލަރުގެ މައްސަލައިގައި ރައީސް ޔާމީންގެ ދިފާޢުގައި ނިކުމެވަޑައިގެންނެވީ، ޕީޕީއެމުގެ ޕީޖީ ލީޑަރު އަހްމަދް ނިހާނެވެ.
ނިހާން ވިދާޅުވި ގޮތުގައި، 1 މިލިއަން ޑޮލަރަކީ އެސްއޯއެފްގެ ލާރި ކަމެއް އޭސީސީން ރައީސް ޔާމީނާ ސުވާލު ކުރުމާ ހަމައަށް ރައީސް ޔާމީނަކަށް އެނގިވަޑައެއް ނުގަންނަވައެވެ.
އަދި 1 މިލިއަން ޑޮލަރު ރައީސް ޔާމީން ބޭނުންފުޅު ކުރައްވާފައި ނުވާ ކަމަށާއި، އެ ފައިސާ ކަމާބެހޭ ފަރާތުގެ(އޭސީސީގެ) ބެލުމުގެ ދަށުގައި އެބަހުރި ކަމަށެވެ.
ނިހާން މިހެން ވިދާޅުވި ނަމަވެސް، ޖެހިގެން އައި ދުވަހު އޭސީސީގެ އޮފިޝަލަކާއި ހަވާލާދީ، ބައެއް މީޑިޔާތަކުގައި ރިޕޯޓްކޮށްފައިވަނީ "އޭސީސީގެ ބެލުމުގެ ދަށުގައި އެ ފައިސާ ނެތް" ކަމަށެވެ.
އެހެން ނަމަވެސް އެހިސާބުން ސަރުކާރުން ވެސް އަދި ރައީސް އަބްދުﷲ ޔާމީން ވެސް އެވާހަކަ ދައްކާފައެއް ނުވެއެވެ. އެހެން ނަމަވެސް، ސަރުކާރަށް ތާޢީދު ކުރާ ކޯޑިނޭޓަރުންނާއި ސިޔާސީ ފަރާތްތަކުން ވިދާޅުވަނީ، ރައީސް ޔާމީން އެ ފައިސާ އޭސީސީ އާއި ހަވާލުކުރައްވާފައިވާ ކަމަށެވެ.
ސުވާލަކީ، ނޫސްވެރިންނަށް ބޮޑެތި އަދަބުތައް ކަނޑައެޅިފައިވާ، ޚިޔާލުފާޅުކުރުމާއި އަބުރު ރައްކާތެރިކުރުމުގެ ޤާނޫނު ފަދަ ގާނޫނުތައް އޮތްވައި މީޑިޔާތަކުގައި ރައީސް ޔާމީން އާއި ބެހޭގޮތުން "ދޮގު ޚަބަރެއް" ލިޔުނު ނަމަ އެ މައްސަލަ ހުށަނާޅަނީ ކީއްވެގެން ހެއްޔެވެ؟
ރިޔާސީ އިންތިޚާބަށް ބޯމަތިވެފައިވާއިރު، ސިޔާސީ ފަރާތްތަކުން ރައީސް ޔާމީންގެ އިސްތަށިފުޅުގައި ވައްކަމުގެ ތުހުމަތު އަޅުވަމުން ގެންދާއިރު، 1 މިިލިއަން ޑޮލަރުގެ ތުހުމަތުން އެމަނިކުފާނު ސަލާމަތް ކުރަން ޖެހެއެވެ. އެއީ ރިޔާސީ އިންތިޚާބު ކާމިޔާބު ކުރުމަށް އެމަނިކުފާނަށް ނުހަނު ބޭނުންތެރި ކަމެކެވެ.