ބެލްޖިއަމްގެ ގޯލްކީޕަރު ތިބޯ ކޯޓުއާ ސްޕެއިނުގެ ރެއާލް މެޑްރިޑަށް ދޫކޮށްލުމަށް ޗެލްސީގެ ކިބައިން އޭނާގެ އޭޖެންޓް ކްރިސްޓޯފް ހެންރޮޓޭ އެދެފިއެވެ.
އިނގިރޭސި ނޫހެއްކަމަށްވާ ސްކައިސްޕޯޓްސް އިން ޚަބަރުލިބޭގޮތުގައި، ޗެލްސީ އިން ކޯޓުއާ ދޫކޮށްލާނީ އޭނާގެ ބަދަލުގައި ފެންވަރު ރަނގަޅު އެހެން ގޯލްކީޕަރެއް ލިބުމުންނެވެ. ނިމިދިޔަ ވޯލްޑްކަޕްގެ އެންމެ މޮޅު ގޯލްކީޕަރުގެ މަޤާމް ހޯދާފައިވާ ކޯޓުއާގެ ކޮންޓްރެކްޓް ހަމަވާން ބާކީ އެންމެ އަހަރެއް އޮތުމުން ޗެލްސީ އިން މަސައްކަތްކުރަނީ އޭނާ ވިއްކާލުމުގެ ބަދަލުގައި ކޮންޓްރެކްޓް އާ ކުރުމަށެވެ.
ޗެލްސީގެ ގޯލްކީޕަރު ތިބޯ ކޯޓުއާގެ އޭޖެންޓް ހެންރެޓޭ ބުނިގޮތުގައި އެކިފަރާތްތަކުން ލިބޭ މަޢުލޫމާތުތަކުގެ މައްޗަށް ބަލާއިރު ކޯޓުއާ އަށް އެހެން ކްލަބަކަށް ބަދަލުވުމުގެ ފުރިހަމަ އިހްތިޔާރު ލިބިގެންވާކަމަށް ޗެލްސީ އިން ބުނެފައިވާކަމަށެވެ.
"އަހަރެންނަށް އެކި ފަރާތްތަކުން ލިބޭ މަޢުލޫމާތުގައި ވާގޮތުން ޗެލްސީ އިން ބުނަނީ ކޯޓުއާގެ އަމިއްލަ އިޙުތިޔާރުގައިވާކަމެކޭ އެހެން ކްލަބަކަށް ބަދަލުވުމަކީ. އޭނާ އަށް ފެންނަ އެންމެ ރަނގަޅު ގޮތަކީ ރެއާލަށް ބަދަލުވުން."
"އޭނާގެ އާއިލާއާއި ގާތުގައި ހުރުމަށް ބޭނުންވާތީވެ، މިއީ އޭނާއަށް ވަރަށް މުހިއްމު ނިންމުމެއް. ރެއާލުން މިހާރުވެސް އޭނާ ގެންދިއުމަށް ޗެލްސީ އަށް ހުށަހެޅުމެއް އޮތީ ތައްޔާރުކޮށްފަ." ހެންރޮޓޭ ބުންޏެވެ.
މީގެއިތުރުން، ހެންރޮޓޭ ބުނީ ކޯޓުއާ އެހެން ކްލަބަކަށް ބަދަލުވާން އުޅެނީ ކޮންމެހެން ބޮޑު މުސާރައެއް ބޭނުންވެގެން ނޫން ކަމަަށާއި މީގެކުރީންވެސް ވަރަށް ރަނގަޅު ހުށަހެޅުންތައް ލިބި އެއަށް ނޫނެކޭ ބުނެފައިވާކަމަށެވެ.
ހެންރޮޓޭ އިތުރަށް ބުނެފައިވާގޮތުގައި ކޯޓުއާ މިހާރު ވިއްކާލައިފިނަމަ އޭނާގެ ކޮންޓްރެކްޓްގައި ބާކީ އޮތް އެއްއަހަރާއި އެކަށީގެންވާ ވަރުގެ އަގެއް ލިބި ބަދަލުގައި އެހެން ކުޅުންތެރިއެއް ގަތުމަށް ހޭދަކުރެވޭނެކަމަށެވެ. އެހެންނަމަވެސް، ޗެލްސީ އިން މިފަހަރުގެ ޓްރާންސްފާ ބާޒާރުގައި އޭނާ ވިއްކާނުލައިފިނަމަ މިސީޒަން ނިމުމުން ހިލޭ ޓްރާންސްފާގައި އެހެން ކްލަބަކަށް ބަދަލުވުމުގެ ފުރުޞަތުލިބޭނެކަމަށާއި އޭގެއިން ޗެލްސީއަށް އެއްވެސް ފައިދާއެއް ނުވާނެކަމަށެވެ.
ޗެލްސީގެ ގޯލްކީޕަރު ތިބޯ ކޯޓުއާ އާއި ބެހޭގޮތުން ނޫސްވެރިން ކުރި ސުވާލަކަށް ޖަވާބުދެމުން އެޓީމުގެ މިހާރު ކޯޗު މައުރީޒިއޯ ސާރީ ބުނެފައިވަނީ ކޯޓުއާގެ ކުރިމަގާއިމެދު އެއްޗެއް ބުނަންނޭނގުނުނަމަވެސް އެކްލަބުގައި މަޑުކުރާނެކަމުގެ އުއްމީދުއެބައޮތްކަމަށެވެ.
ޗެލްސީ އާ ސީޒަނުގައި ކުޅޭ ފުރަތަމަ މެޗުގައި އަންނަ އާދިއްތަ ދުވަހު ކޮމިއުނިޓީ ޝީލްޑް މެޗުގައި ސިޓީއާ ދެކޮޅަށް ނިކުތުމަށް ހަމަޖެހިފައިވާއިރު އެމެޗުގައި ތިބޯ ކޯޓުއާ ނުކުޅޭނެއެވެ. އޭނާ އެޓީމުގެ ޕްރީ ސީޒަން ތަމްރީނުތަކުގައި ބައިވެރިވުމަށް ހަމަޖެހިފައިވަނީ އަންނަ ހޯމަ ދުވަހު އެވެ.
މިފަހަރުގެ ޕްރިމިއާ ލީގުގައި ޗެލްސީ ކުޅޭ ފުރަތަމަ މެޗުގައި މިމަހުގެ 11 ވަނަ ދުވަހު ރަށުން ބޭރުގައި ނިކުންނާނީ ހަޑަސްފީލްޑް ޓައުން އާ ދެކޮޅަށެވެ.