ގުޅިފައިވާ ސިޔާސީ ޕާޓީތަކުގެ 4 ލީޑަރުންގެ ފޮޓޯތައް ނައްތާން ފުލުހުން ދިމާކޮށްފި ނަމަ އޭގެ މާނަ އަކީ ސަރުކާރުން ބަލި ޤަބޫލުކުރުން ކަމަށް ކެންދޫ ދާއިރާގެ މެންބަރު އަލީ ހުސައިން ވިދާޅުވެއްޖެއެވެ.
އަލީ ހުސައިން ވިދާޅުވި ގޮތުގައި، 4 ލީޑަރުންގެ ފޮޓޯ ވަރަށް ގިނަ ވާނެ ކަމަށެވެ. އަދި ފުލުހުން އެ ފޮޓޯތައް ނައްޓަން ފެށުމަކީ، މިހާރު ވެސް އިންތިޚާބުން ބަލިވާނެ ކަން ސަރުކާރުން ޤަބޫލުކުރުން ކަމަށެވެ.
Gulhifaivaa party thakuge 4 leaderunge photo thah varah ginavaane. Fuluhun e photo thah nattan dhimaa koffinama eyge maana akee mihaaruves sarukaarun bali qaboolu kuree ey.
— Ali Hussain (@AleeVoice) August 4, 2018
ގުޅިފައިވާ ސިޔާސީ ޕާޓީތަކުން ދަނީ ރިޔާސީ އިންތިޚާބުގެ ކެމްޕެއިންގައި ރައީސް މައުމޫން، އަދާލަތު ޕާޓީގެ ރައީސް ޝެއިޚް އިމްރާން، ރައީސް މުހައްމަދު ނަޝީދު އަދި ޖޭޕީގެ ލީޑަރު ޤާސިމް އިބްރާހިމްގެ ފޮޓޯ ހިމެނޭ ޕޯސްޓަރު ބޭނުންކުރަމުންނެވެ.
އެ ޕޯސްޓަރުތައް ބޭނުކުރަމުން ދަނިކޮށް ފުލުހުން ނެރުނު ބަޔާނެއްގައި ވަނީ، އެގޮތަށް އަމަލުކުރާ ފަރާތްތަކާއި މެދު ޤާނޫނީ ފިޔަވަޅު އަޅާނެ ކަމަށެވެ. އެހެން ނަމަވެސް ފުލުހުން ފިޔަވަޅު އަޅަނީ، އަދި އެފަދަ އެންގުމެއް އަންގާފައި ވަނީ ކޮން ޤާނޫނެއްގެ ދަށުން ކަމެއް ބުނެފައެއް ނުވެއެވެ.
އިދިކޮޅު ހަތަރު ސިޔާސީ ލީޑަރުންނަށް ވެސް ވަނީ އެކި ކުށްތަކުގައި ޖަލު ހުކުމް އިއްވާފައެވެ.