ދިވެހިރާއްޖޭގައި ސިޔާސީ ގޮތުން ހިނގާފައިވާ ބޮޑެތި ކަންކަމާއި ދިމާކޮށް އަބަދުވެސް "އަމާންކަން ނަގާލަން ބަޔަކު އުޅޭ" ކަމަށް ބުނެ ސަލާމަތީ ބާރުތަކުން ވަރަށް ހަރަކާތްތެރިވާ މަންޒަރު ފެނެއެވެ. އޭގެ މިސާލުތައް ބައިވަރެވެ.
2015 ވަނަ އަހަރުގެ "މޭޑޭ" މުޒާހަރާ އާއި ދިމާކޮށް ވެސް ސިފައިންނާއި ފުލުހުން، "ހަމަނުޖެހުން ނަގާލަން ބަޔަކު އުޅޭ" ކަމަށް ބުންޏެވެ. އަދި އޭގެ ފަހުންވެސް މާލޭގައި ސަރުކާރާއި އިދިކޮޅަށް މުޒާހަރާއެއް ބާއްވަން އިއުލާން ކުރުމާއި އެކު "ހަމަނުޖެހުން ނަގާލަން އުޅޭ" ކަމަށް ބުނެ ފުލުހުންނާއި ސިފައިން ވާހަކަ ދައްކައެވެ.
ކުރީގެ ނައިބު ރައީސް އަހްމަދު އަދީބު ހައްޔަރުކުރުމަށްފަހު ހިނގައިދިޔަ ކަންތަކަށްފަހު، ވެސް ސިފައިންނާއި ފުލުހުން ބުނަމުން ދިޔައީ، "ހަމަނުޖެހުން ނަގާލަން ބަޔަކު" އުޅޭ ވާހަކައެވެ.
މިއަހަރުގެ ފެބްރުއަރީ މަހުގެ 1 ވަނަ ދުވަހު، ވެސް "ހަމަނުޖެހުން ނަގާލަން އުޅޭ" ކަމުގެ އުޒުރާއި އެކު ސިފައިންނާޢި ފުލުހުން ނިކުމެ 2 ފަނޑިޔާރަކާއި ސިޔާސީ ގިނަ ބަޔަކު ވެސް ހައްޔަރުކުރީއެވެ.
ފާއިތުވި 5 އަހަރު ދުވަހުގެ ތެރޭގައި ސިފައިންނާއި ފުލުހުން ކުއްލި ހާލަތަށް އަންނަ ކޮންމެ ފަހަރަކު ސިޔާސީ ގޮތުން ކޮންމެވެސް ކަންތަކެއް ހިނގައެވެ. މިފަހަރު ސިފައިން ނިކުމެފައި މިވަނީ، "އަމާންކަން ބަޔަކު ނަގާލަން އުޅޭތީ" ކަމަށް ބުނެއެވެ.
ރިޔާސީ އިންތިޚާބަށް 50 ދުވަހަށް ވުރެ ކުޑަވެފައި ވަނިކޮށް ސިފައިން ކުއްލި ހާލަތަށް ގެނެސްފައިވާއިރު މީގެ ކުރިން ހިނގާފައިވާ ކަންތަކަށް ބަލާފައި މިއީ، އިންތިޚާބު ފަސްކުރަން ނިންމުމުގެ ކޮޅުމަތި ކަމަށް ވެސް ވެދާނެއެވެ. ނުވަތަ އެނޫން ވެސް ސިޔާސީ ބޮޑު ކަމެއް ހިނގަން އުޅުމުގެ އަލާމާތެއް ކަމަށް ވެސް ވެދާނެއެވެ.
ރައްޔިތުންނަށް އޮތީ ކުރިއަށް އޮތް ހަފްތާ ނިމެންދެން އިންތިޒާރު ކުރުމެވެ.