ދިވެހިރާއްޖޭގެ ސަލާމަތަށް ހުރި އެންމެ ބޮޑު ނުރައްކަލަކީ ރައީސް އަބްދުﷲ ޔާމީން ކަމުގައި ގަލޮޅު ދެކުނު ދާއިރާގެ މަޖިލިސް މެންބަރު އަހްމަދް މަހްލޫފް ވިދާޅުވެއްޖެއެވެ.
މަހްލޫފް މިހެން ވިދާޅުވެފައިވަނީ، "ނުރައްކަލެއްގެ މައުލޫމާތު" ލިބިފައިވާ ކަމަށް ބުނެ ސިފައިން ކުއްލި ހާލަތަށް ގެނެސްފައިވާތީ އެކަމަށް ރައްދު ދެއްވައި ކުރެއްވި ޓްވީޓެއްގައެވެ.
އެ ޓްވީޓްގައި ފުލުހުންނާއި ސިފައިންގެ މުއައްސަސާ އާއި މުޚާތަބުކުރައްވައި، މަހްލޫފް ވިދާޅުވީ، "މި ގައުމުގެ ސަލާމަތަށް އޮތް އެންމެ ބޮޑު ނުރައްކަލަކީ ޔާމީން ކަން ފުލުހުންނާއި ސިފައިންނަށް ދަންނަވަން" ކަމަށެވެ.
މަހްލޫފް އިތުރަށް ވިދާޅުވެފައިވާ ގޮތުގައި، ދުނިޔޭގެ އެހެން ގައުމުތަކުގައި ވެސް ބަޑިޖަހާ ބޮންގޮއްވާ އެތައް ބަޔަކު މަރާ ހަމަނުޖެހުން ހިންގަމުން ދާއިރު ވެސް ފަސްކުރުމަކާއި ނުލައި ރިޔާސީ އިންތިޚާބު ބާއްވާ ކަމަށެވެ. އެހެން ވިދާޅުވެ މިސާލެއްގެ ގޮތުގައި މަހްލޫފް ގެންނެވީ، ޕާކިސްތާން އާއި ސީރިޔާގެ މިސާލެވެ.