ކުރިއަށް ދުވަސްތަކުގައި ގައުމު ހަލަބޮލިކުރަން ބަޔަކު މަސައްކަތް ކުރަމުން ދާތީ، ކުއްލިގޮތަކަށް "ނުރައްކަލުގެ އިންޒާރު" ޑިފެންސް މިނިސްޓަރު އާދަމް ޝަރީފް ދިވެހި ރައްޔިތުންނާއި ހިއްސާކުރެއްވީ ފޭސްބުކް އެކައުންޓް މެދުވެރިކޮށެވެ.
މިއީ ރާއްޖޭގެ ތާރީޚުގައި މިފަދަ ގޮތަކަށް، ޑިފެންސް މިނިސްޓަރަކު އަމަލުކުރެއްވި ފުރަތަމަ ފަހަރު ކަަމަށް ފަހަރެއްގައި ވެދާނެއެވެ. މީގެ ކުރިން ޤައުމުގައި ނުރައްކާތެރި ހާލަތު މެދުވެރިވެފައިވާ ކަމަށް ސަލާމަތީ ޚިދުމަތްތަކުން ހާމަކުރަނީ، ނޫސްބަޔާންތަކާއި ނޫސްކޮންފަރެންސްތައް މެދުވެރިކޮށެވެ.
އެހެން ނަމަވެސް، މިފަހަރު ޑިފެންސް މިނިސްޓަރު އާދަމް ޝަރީފް އެބޭފުޅާގެ ފޭސްބުކް އެކައުންޓް މެދުވެރިކޮށް "ސިފައިންނާއި ފުލުހުން އެލާޓަށް ގެނެސްފައިވާ" ވާހަކަ ހިއްސާކުރަން ޖެހިވަޑައިގެންނެވީ ކީއްވެގެން ހެއްޔެވެ؟
ޝަރީފްގެ ފޭސްބުކް އެކައުންޓް މެދުވެރިކޮށް "ސިފައިން ގާނޫނީ ވާޖިބު އަދާކުރާނެ ކަމުގެ ޔަގީންކަން" ދެއްވި އިރު ސިފައިންނާއި ފުލުހުންގެ ރަސްމީކޮށް ބޭނުންކުރާ ސޯޝަލް މީޑިޔާގެ އެއްވެސް އެކައުންޓަކުން އެފަދަ މައުލޫމާތެއް ހިއްސާކޮށްފައެއް ނުވެއެވެ.
ފަހަރެއްގައި ރަސްމީ ބަޔާން ސިފައިންނާއި ފުލުހުން އަދި ޑިފެންސް މިނިސްޓްރީން ނެރޭނީ މާދަމާ އޮފީސްތައް ހުޅުވުމުން ކަމަށް ވެސް ވެދާނެއެވެ.
ބައެއް ސިޔާސީ ފަރާތްތަކުން މިނިސްޓަރު ޝަރީފްގެ އަމިއްލަފުޅު ފޭސްބުކް އެކައުންޓުން "ނުރައްކާތެރި ހާލަތެއްގެ" ވާހަކަ ހިއްސާކުރުމުން އެކަމަށް ދަނީ ފާޑުކިޔަމުންނެވެ.
އެގޮތުން ކެންދޫ ދާއިރާގެ މެންބަރު އަލީ ހުސައިން ވިދާޅުވެފައި ވަނީ ޝަރީފް އެގޮތަށް ކަންތައް ކުރެއްވުމުން ސިފައިންގެ ތެރޭގައި ކޮމާންޑް އާއި ޕްރޮޓޮކޯލް އޮތް ހާލަތު އޮތް ގޮތާއި މެދު ސުވާލު އުފައްދަވާފައެވެ.