ވެނެޒުއޭލާގެ ރައީސް ނިކޮލަސް މަދޫރޯ އަވަހާރަކޮށްލުމަށް ޑްރޯންތަކެއްގައި ގޮވާތަކެތި ހަރުކޮށްގެން ހަމަލާއެއް ދޭން މަސައްކަތް ކޮށްފިއެވެ.
މި ހަމަލާގައި ނިކޮލަސް މަދޫރޯ އަށް އަނިޔާއެއް ނުވެ ސަލާމަތްވި ނަމަވެސް، އޭނާގެ ހަށިފާރަވެރިންގެ ތެރެއިން 7 މީހަކަށް ވަނީ އަނިޔާވެފައެވެ.
ވެނެޒުއޭލާގެ އަސްކަރިއްޔާގެ 81 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތުގައި ރައީސް މަދޫރޯ ވާހަކަ ދައްކަވަމުން ގެންދަވަނިކޮށް އޭނާ އާއި ވަރަށް ކައިރިން ޑްރޯންތައް އުދުހެން ފެށުމާއި އެކު ސެކިއުރިޓީން ވަނީ އޭނާ އެހިސާބުން ދުރަށް ގެންގޮސްފައެވެ.
މި ހާދިސާގައި މަދޫރޯ އަށް އަނިޔާއެއް ނުވި ނަމަވެސް ފަސްޓް ލޭޑީ އަށް ކޮންމެވެސް ވަރަކަށް އަނިޔާވެފައިވާ ކަމަށް ބައެއް ރިޕޯޓްތައް ބުނެއެވެ.
URGENTE: El desfile de Maduro se suspendió inesperadamente. Todos salieron corriendo. pic.twitter.com/Dyb0ffb1QZ
— Yusnaby Pérez (@Yusnaby) August 4, 2018
މިހަމަލާގެ ޒިންމާ އަދި އެއްވެސް ފަރާތަކުން އުފުލާފައި ނުވާއިރު މަދޫރޯ ވަނީ އެހަމަލާގެ އަޑީގައި ތިބީ އެގައުމުގެ ކަނާތު ފިޔައިގެ ސިޔާސީ ފަރާތްތައް ކަމަށް ތުހުމަތު ކޮށްފައެވެ.
އެމެރިކާއިން ވެނެޒުއޭލާ އާއި ދެކޮޅަށް ދަތިކުރުމުގެ ފިޔަވަޅު އަޅާފައިވާއިރު އެގައުމަށް ވަނީ އިޤްތިސާދީ ބޮޑެތި މައްސަލަތަކާއި ކުރިމަތިލާން ޖެހިފައެވެ. ޔޫރަޕިއަން ޔޫނިއަން(އީޔޫ) އިން ވެސް ވަނީ، މެއި މަހު ވެނެޒުއެލާގައި ބޭއްވި އިންތިޚާބަށް ފަހު އެ ގައުމުގެ ސަރުކާރުގެ އޮފިޝަލުންނާ ދެކޮޅަށް ފިޔަވަޅު އަޅާފައެވެ.
ޔޫރަޕިއަން ޔޫނިއަން އިން ބުނެފައި ވަނީ ވެނެޒުއެލާގައި ބާއްވާފައި ވަނީ މިނިވަން، އިންސާފުވެރި އިންތިޚާބެއް ނޫން ކަމަށެވެ.