މެންޗެސްޓަރ ޔުނައިޓެޑުން ޕްރިމިއާ ލީގުގައި ކުޅެމުން އަންނަ ބެލްޖިއަމްގެ ޑިފެންޑަރު ޓޮބީ އަލްޑަވިރެލްޑް ގެންދިއުމަށް އޭނާގެ ކްލަބު ޓޮޓެންހަމް އާ އެކު އެއްބަސްވުމަކަށް އައިސްފައިވާކަމަށާއި ކުރިއަށްއޮތް 48 ގަޑިއިރުތެރޭގައި އެކްލަބަށް ސޮއިކުރާނެކަމަށް އިނގިރޭސި ނޫހެއްކަމަށްވާ މިރޯ ގައިވެއެވެ.
އެންމެފަހުގެ މީޑިއާ ރިޕޯޓްތަކަށް ބަލާއިރު ޔުނައިޓެޑުން އަލްޑަވިރެލްޑް ގެންދިއުމަށް 60 މިލިއަން ޕައުންޑްގެ ފީ އަކަށް ޓޮޓެންހަމް އާ އެކު އެއްބަސްވެފައިވާކަމަށްވެއެވެ.
މީގެކުރީން، ޔުނައިޓެޑުން ވަނީ އިނގިރޭސި ޑިފެންޑަރު ހެރީ މެގުއަޔާ އާއި ކޮލަމްބިއާގެ ޔެރީ މީނާ ގެންދިއުމަށް މަސައްކަތްކޮށްފައެވެ.
އެހެންނަމަވެސް، މިދެކުޅުންތެރިން ގެނައުމަށް ކުރި މަސައްކަތް ކާމިޔާބުވާގޮތްނުވުމުން ޕްރިމިއާ ލީގުގައި ކުޅުމުގެ ތަޖުރިބާހުރި ޑިފެންޑަރަކަށްވާތީވެ އަލްޑަވިރެލްޑް ގެންދިއުމަށް އެޓީމުގެ ކޯޗް ހޯސޭ މޮރީނިއޯ ނިންމީކަމަށް ބެލެވެއެވެ.
އަލްޑަވިރެލްޑް ވަނީ 2015 ވަނަ އަހަރުން ފެށިގެން މިހާތަނަށް ޓޮޓެންހަމް އަށް ކުޅުނު 109 މެޗުގައި 6 ގޯލް ކާމިޔާބުކޮށްފައިވެއެވެ. އެހެންނަމަވެސް، އަނިޔާގެ ސަބަބުން ނިމިދިޔަ ސީޒަނުގެ ވަރަށް ބޮޑުބައި އޭނާ އަށް ވަނީ ގެއްލިފައެވެ. އެގޮތުން، ޓޮޓެންހަމް އިން ލީގުގައި ކުޅުނު 38 މެޗުގެތެރެއިން އޭނާ އަށް ކުޅެވޭވަރުވީ އެންމެ 14 މެޗެވެ. މުޅި ސީޒަނުގައި އޭނާ އަށް ކުޅެވުނީ ޖުމްލަ 21 މެޗެވެ. މިއީ ޢާއްމުކޮށް ސީޒަނެއްގައި ކުޅޭ މެޗުތަކުގެ އަދަދުގެ ދެބައިކުޅައެއްބަޔާއި އެއްވަރުގެ އަދަދެކެވެ.
މީގެއިތުރުން، އޭނާ ވަނީ އެންމެފަހުގެ ވޯލްޑްކަޕްގައި ބެލްޖިއަމް އެމުބާރާތުގެ ތިންވަނަ ހޯދިއިރު އެޓީމުގެޑިފެންސްލައިންގައި މުހިއްމު ދައުރެއް އަދާކޮށްފައެވެ. އޭނާ ވަނީ ބެލްޖިއަމަށް 2009 ވަނަ އަހަރުން ފެށިގެން ޤަވާއިދުން ކުޅެމުން އައިސް 83 މެޗު ހަމަކޮށްފައެވެ.